लसएञ्जल्स । एक किशोरले दक्षिण क्यालिफोर्नियास्थित हाइस्कुलमा गोली चलाउँदा दुई विद्यार्थीको मृत्यु भएको छ ।

 

जम्मा १६ सेकन्डमा ती किशोरले दुई जनाको ज्यानमात्र लिएनन् तीन जनालाई घाइते बनाए र स्वयम् आत्महत्याको प्रयाससमेत गरे ।

 

स्यान्टा क्लेरिटास्थित हाइस्कुलमा यो घटना भएको हो । मृत्यु हुने दुई जनामध्ये एक जना १६ वर्षीय किशोरी र अर्का १४ वर्षका विद्यार्थी छन् । घाइते पाँचै जनालाई तत्काल अस्पताल लगिएको थियो । जसमध्ये दुईजनाको अस्पतालमै निधन भएको हो । 

 

यो १६ सेकेन्डको कार्यले जताततै रुवावासी र भागदौड मच्चिएको थियो । सम्भावित अभियुक्त न्याथेनियल बेर्हवले झोलामा बन्दुक ह्याण्डगन ल्याएका थिए ।

 

स्थानीय प्रहरीले १६ वर्षका अभियुक्त मानिएका बन्दुकधारीको अवस्था पनि चिन्ताजनक छ । उनले अन्तिम गोलीले आफूलाई नै घाइते बनाएका थिए ।

 

कक्षा सुरू हुनुअघि यो घटना भएको थियो । स्कुलको भिडियोमा ती किशोरले आफ्नै साथीलाई गोली हानेपछि आफूलाई पनि गोलीको सिकार बनाएको देखिन्छ ।

 

त्यसैले यो घटनामा एक जनामात्र बन्दुकधारी संलग्न भएको प्रारम्भिक अनुसन्धानले देखाएको छ । तर, स्थानीय प्रशासन र प्रहरीले घटनाको अध्ययन गरिरहेका छन् ।  तस्बिर: सामाजिक संजाल