एनआरएन अमेरिकाको आगामी नेतृत्वका लागि उम्मेदवारी घोषणा गर्ने लहरनै चलेको छ । निर्वाचन कहिले हुन्छ दिन किटान भएको छैन । तर, उम्मेदवारका विभिन्न अनावश्यक तामझामहरु देखिएका छन् । सामाजिक सञ्जालहरूमा विभिन्न पदमा विभिन्न उम्मेदवार आईरहेका छन् । यो एनआरएन अमेरिका संस्था प्रति आकर्षण हो या लै लैमा उम्मेदवारी घोषणा ? प्रश्नहरू उठेका छन् । यो अवस्था एनआरएन अमेरिकामा मात्र होइन च्याप्टरमा समेत देखिन थालेको छ ।
कुनै पनि संस्थालाई निर्वाचनले जीवन्त बनाउँछ । यो सबैभन्दा प्रजातान्त्रिक अभ्यास पनि हो । तर, एनआरएन अमेरिकाको हकमा प्रतिस्पर्धाको नतिजा त्यत्ति उज्यालो छैन । चार वर्ष अघि अध्यक्षपदमा पराजित हुनेहरू निर्वाचन प्रकृयालाई स्विकार्न सकेनन् । अदालतमा गए । उनीहरू अदालतमा मात्र गएनन त्यसवेला निर्वाचनमा प्रतिस्पर्धा गरेका कयौँ उम्मेदवार एनआरएन अमेरिकामा पुन सक्रिय देखिएनन् । पछिल्लो निर्वाचनमा पनि पराजित उम्मेदवार फेरी चुनावको वैधानिकतालाई चुनौती दिदैं अदालत गए । यो मुद्दा अझै टुंगो लागिसेको छैन । त्यसवेला पराजित उम्मेदवार मध्ये कयौँ निष्कृय रहे । एनआरएन अमेरिकाको चुनावी लफडाको असर काठमाडौँमा एनआरएनएको भेलामा समेत पर्यो ।
एनआरएन संघ एउटा अभियानको रूपमा जन्मेको हो । विदेशमा बस्ने नेपालीहरूको सङ्ख्या बढ्ने क्रमसँगै प्रवासमा रहने नेपालीका विभिन्न एजेन्डा उठाउनका लागि एनआरएनए अभियान सुरु भएको थियो । अहिले करिब ५० लाख नेपाली विदेशमा रहेको अनुमान छ । यी विदेशमा बस्ने नेपालीका थुप्रै मुद्दाहरू छन् । विदेशमा बस्ने नेपालीको पक्षमा सरकार र सरोकारवालाहरूसँग कुरा राख्न, दबाब दिन नै एनआएन अभियान अगाडी आएको हो । यो अभियान जारी छ ।
एनआरएन अभियानका मुद्दाहरू विदेशमा बस्ने सबै नेपालीका प्राय साझा मुद्दाहरू हुन् । नेपाली नागरिकताको निरन्तरता देखि नेपालमा लगानी प्रवद्र्धनसम्मका एजेण्डाहरु यहाँ जोडिएका छन् । एनआरएन अभियान यी एजेण्डामा मात्र सीमित छैन । यो अभियानले विदेशमा बस्ने नेपाली पनि सञ्जाल विस्तार पनि गरिरहेको छ । यसले विदेशमा बस्ने नेपालीलाई ज्ञान र सिप विस्तार गर्न सहयोग पुगेको छ । त्यसैले एनआरएन अभियान जति बढी मबजुत भयो त्यत्ती प्रवासमा बस्ने नेपालीका एजेण्डाहरु सुन्न सरकार र सरोकारवालाहरु बाध्य हुन्छन् । विदेशमा बस्ने समुदाय फुटेर होइन जुटेर मात्र यो सम्भव छ ।
स्थायी रूपमा विदेशमा बस्ने नेपालीको सङ्ख्या बढी भएको देश अमेरिका हो । यहाँ नेपाली समुदाय ठुलो भए पनि एनआरएन अमेरिकाको प्रभाव भने यो अभियानमा कम छ । विदेशमा बस्ने नेपालीका मुद्दा सरोकारवाला समक्ष प्रभावकारी रूपमा राख्न पनि अमेरिका बस्ने नेपाली अझ जुट्नुपर्ने अवस्था छ । तर, यहाँ यसका लागि उपयुक्त वातावरण तयार भएको छैन । आफ्नै संस्था गएगुज्रेको बनाउने नेपाली राजनीतिक पार्टीका भातृसंगठन भन्ने संस्थाका कार्यकर्ता बताउनेहरूले चुनावमा यो पक्षलाई जिताउनु पर्छ यसलाई हराउनु पर्छ भनेर समेत लागेका छन् ।
आफूलाई नेपाली राजनीतिक पार्टीका कार्यकर्ता भन्नेहरूले आफू निकट पार्टीलाई राम्रो सल्लाह दिए त्यो देश र नेपाली जनताको हितमा हुन्छ । स्वदेश वा विदेशमा बस्ने नेपाली जनताले राजनीतिक पार्टीलाई सुधारका लागि दबाब दिने कोही होस भन्ने चाहेका पनि छन् । सकिन्छ भने त्यहाँ केही गरौँ । एनआरएन अभियानमा सरकार र राजनीतिक पार्टीलाई दबाब दिन सक्ने व्यक्तिको खाँचो छ, विशुद्ध राजनीतिक कार्यकर्ताको होइन ।
म नै नेतृत्वमा जानु पर्छ भन्दा पनि सबैलाई समेटेर कसरी एनआरएन अमेरिकालाई मबजुत बनाउने यो अहिलेको मुख्य चुनौती हो । त्यसैले हामी सकेसम्म धेरै भन्दा धेरै उम्मेदवार हुने भन्दा पनि मिलेर जान सक्ने वातावरणका लागि पहल गर्न एनआरएनका शुभचिन्तक र जिम्मेवारव्यक्तिहरुलाई अनुरोध गर्छौ । दुई दुई वर्षमा हुने निर्वाचनमा पालो पर्खिदापनि फरक पर्दैन । एनआरएन अमेरिकालाई मजबुत र विवादरहित बनाउनका लागि आफू नेतृत्वमा जानुपर्छ भने हठ त्याग्नु सक्नुपर्छ । नेतृत्वभन्दा बाहिर वसेरपनि संस्थालाई मजबुत बनाउन सकिन्छ । नेतृत्व लिन चाहनेलेपनि सबैलाई समेटेर लैजान सक्छु भन्ने आँट र इमान्दारिता देखाउन सक्नु पर्छ । तवमात्र एनआरएन अमेरिका मजबुत हुन्छ ।
प्रतिक्रिया