काठमाडौं । कञ्चनपुरकी १३ वर्षीय बालिका निर्मला पन्तको बलात्कारपछि हत्या घटनाको अनुसन्धानका क्रममा प्रमाण नष्ट गर्ने र निर्दोषलाई कडा यातना दिने प्रहरीलाई कारवाहीको माग गर्दै आमा दुर्गादेवी पन्तले प्रहरीमा जाहेरी दिएकी छन् ।
जिल्ला प्रहरी कार्यालय कञ्चनपुरमा निर्मलाकी आमा दुर्गादेवी र दिलीप विष्टका दाइ खड्ग विष्टले जाहेरी दिएका हुन् ।
बर्खास्तीमा परेका एसपी दिल्लीराज विष्ट, प्रहरी इन्स्पेक्टर जगदीश भट्ट, डीएसपी अंगुर जिसी, ज्ञानबहादुर सेठीलगायतका प्रमाण नष्ट गर्न सहयोग गर्ने सबै प्रहरीमाथि कारवाहीको माग गर्दै जाहेरी दिएकी छन् ।
खड्ग विष्टले निर्दोष भाइलाई यातना दिइएको भन्दै यातना दिनेविरुद्ध जाहेरी दिएका हुन् ।
डीएनए रिपोर्ट अझै आएन
निर्मला पन्तको हत्याको आरोपमा पक्राउ परेका दुईजनाको डीएनए रिपोर्ट अझै नआएको प्रहरीले जनाएको छ ।
हत्यामा संलग्नताको आशंकामा काठमाडौंमै राखेर भीमदत्तनगर–१८ का विशाल चौधरी र प्रदीप रावलमाथि अनुसन्धान जारी छ । कञ्चनपुर प्रहरीका एसपी कुवेरसिंह कडायतले विशाल र प्रदीपको डीएनए रिपोर्ट अझै आइनसकेको बताए ।
घटनासँग जोडिएका प्रमाणको खोजीमा प्रहरी सक्रिय छ । बयानकै आधारमा प्रहरीले प्रदीप र विशालमाथि अनुसन्धान गरिरहेको छ । तर उनीहरुका आफन्तले भने प्रदीप र विशाल निर्दोष भएको दाबी गर्दै आएका छन् ।
शंकाको घेरामा राज्यको सुरक्षा निकायमै कार्यरत केही व्यक्ति समेत अझै छन् । तर, प्रदीप र विशालको अनुसन्धानको पाटो नटुंगिएसम्म प्रहरी अरुको डीएनए परीक्षण गर्ने मनस्थितिमा छैन ।
प्रतिक्रिया