हिमालयखवर संवाददाता
अमेरिका- बाल्टिमोर काउण्टी प्रहरीले दुर्घटना गरेर भागेको (हिट एण्ड रन) अभियोगमा ३६ वर्षीय मान बहादुर गुरुङलाई पक्राउ गरेको छ । रोजडेलमा बस्ने गुरुङले गत डिसेम्बर ८ मा चलाएको गाडीले टाउसन यूनिर्भसिटीका विद्यार्थी २० वर्षीय एमजी निउवे लाई ठक्कर दिएको थियो । ठक्कर दिएपछि गुरुङले नियमअनुसार गाडी रोकेर प्रहरीलाई खबर गर्नु पर्नेमा भागेका थिए । उनको पछि आएको अर्को गाडीका चालकले रोकेर प्रहरीलाई खबर गरेका थिए ।
प्रहरीले निउवेलाई अस्पताल लगेको थियो । त्यही मृत्यु भइसकेको घोषणा गरिएको थियो । पक्राउ परेका गुरुङलाई ४ वटा अभियोग लगाइएको छ । उनलाई धरौटीमा छुट्न नपाउने गरी जेलमा राखिएको छ ।
गुरुङले चलाएको २०१७ को ग्रे टोयोटा टुन्ड्रा गाडीले निउवेलाई नर्थ चाल्र्स स्ट्रिट क्रस गर्दा ठक्कर दिएको थियो । बाल्टिमोर प्रहरीले गुरुङको गाडीको स्पिड, उनले ड्रग वा रक्सी पिए नपिएको लगायतका दुर्घटनाका कारण अनुसन्धान गरिरहेको छ ।
हिट् एण्ड रन केशलाई अमेरिकामा अपराध मानिन्छ । दुर्घटना भईहाले रोकेर प्रहरीलाई खबर गर्नु पर्ने नियम छ । तस्बिर : सामाजिक संजाल
प्रतिक्रिया