काठमाडौं । नुवाकोटको ध्याङफेदी सिसिफु–१ मा शुक्रबार दिउँसो मिनिट्रक दुर्घटना हुँदा ३० जनाको मृत्यु भएको आशंका गरिएको छ ।
शिखरबेँसीबाट घ्याङफेदीतर्फ जाँदै गरेको मिनीट्रक दुर्घटना हुँदा १६ जनाको शव भेटिएको जिल्ला प्रहरी कार्यालयका डीएसपी भीमलाल भट्टराईले जानकारी दिए ।
घटनास्थलमा पुगेको प्रहरीले ५ जनालाई उद्धार गरी स्वास्थ्य संस्थामा पठाएको छ । उद्धार कार्य जारी रहेकाले घाइते र मृतकको संख्या बढ्न सक्ने डीएसपी भट्टराईको भनाइ छ । दुर्घटनास्थल पुग्न सदरमुकाम विदुरदेखि साढे ३ घण्टा समय लाग्ने डीएसपी भट्टराईले जानकारी दिएका छन्।
तामाङ समुदायको साँस्कृतिक पर्व मनाएर फर्किंदै गरेकाहरु दुर्घटनामा परेको प्रहरीले जनाएको छ । ध्याङफेदी सिसिफुबाट वडा नम्बर ७ सिम्टाङ फर्किंदै गरेको बा३ख ३९१३ नम्बरको गाडी दुर्घटनामा परेको हो । ४६ जना सवार गाडी दुर्घटना हुँदा ३० जनाभन्दा बढीको मृत्यु भएको दुप्चेश्वर गाउँपालिका उपाध्यक्ष अञ्जु आचार्यले बताएकी छन् ।
प्रहरीका अनुसार आइचरमा सवार ४६ जनामध्ये १६ जनाको शव भेटिएको र अझै १४ जनाभन्दा बढीको हताहत भएको आशंका गरिएको छ ।
घटनाबारे जानकारी पाएपछि जिल्ला प्रहरी कार्यालय नुवाकोटका डीएसपी भट्टराईको टोली दुर्घटनास्थलतर्फ गएको छ । दुर्घटनास्थल पुग्न सदरमुकाम विदुरदेखि साढे ३ घण्टा समय लाग्ने डीएसपी भट्टराईले जानकारी दिए । दुर्घटनाको विस्तृत विवरण भने आउन बाँकी रहेको छ ।
प्रतिक्रिया