ड्यालस (अमेरिका) – नेपाली कला समूह टेक्ससले शुक्रबार स्वर सम्राट नारायण गोपाललाई सम्झने भएका छन् ।

 

२०४७ सालमा निधन भएका स्वर सम्राट नारायण गोपाललाई स्मरण गर्दै डिसेम्बर १४ शुक्रबार कला समूहले अर्भिङमा विशेष सांगितीक कार्यक्रम सहित ‘नारायण गोपाल स्मृति साँझ’ गर्न लागेको हो । समूहका अध्यक्ष एवं हाँस्य कलाकार नारायण त्रिपाठीले नारायण गोपाललाई सम्झिएर शुक्रबार साँझ नेपाली मन्दिरमा (नेपाली समाजको सभा कक्ष हल) विशेष कार्यक्रम आयोजना गर्न लागेको जानकारी दिए । 

 

‘स्वर सम्राटको सम्झनामा त्यस साँझ हामीले स्थानीय कलाकारहरुबाट गीत गाउने, नाच्ने कार्यक्रम राखेका छौं,’ त्रिपाठीले भने । जो सुकै श्रष्टालाई सम्मान गर्दै आगामी दिनमा यस्ता कार्यक्रमहरु नियमित रुपमा गर्दै जाने योजना संस्थाले बनाएको छ ।

 

नेपाली कला समूह गठन पछि यो पहिलो कार्यक्रम हो । त्यस अवसरमा स्थानीय कलाकारहरु केशव पौडेल, भीम चापागाई, भीम थापा, राम पाण्डे, तुङ्गनाथ उपाध्यायले सांगितीक प्रस्तुती दिनेछन् । आयशा ओझाले नृत्य प्रस्तुत गर्ने कार्यक्रम समेत तय भएको छ ।

 

शुक्रबार साँझ ५ बजेदेखि कार्यक्रम सुरु हुने त्रिपाठीले जानकारी दिए । कार्यक्रममा उपस्थित भएर निशुल्क सांगितीक मनोरञ्जन लिनका लागि समूहले सबै नेपाली समुदायसँग आग्रह गरेको छ ।