हिमालयखवर संवाददाता-
ड्यालस (टेक्सस) । नेपाल जर्नीले चितवनको भरतपुरमा सुविधासम्पन्न पुस्तकालय बनाउन यही डिसेम्बर ८ शनिबार गाला डिनर राखेको छ ।
अमेरिकामा कार्यरत सर्जिकल टेक्निसियन माैसमी श्रेष्ठले यो अभियानको नेतृत्व लिएकी छिन् । यसअघि उनकै सकृयतामा औसतस्तरका ६ वटा पुस्तकालयहरु नेपालमा बनिसकेका छन् । स्याङजाको चिसापानी, चितवनको लोथर, हेटौंटा, चितवनको क्षेत्रपुर, नवलपरासीमा पुस्तकालयहरु बनिसकेका छन् ।
भरतपुरमा पाँचलाख डलरको लागतमा अपाङ्गमैत्री पुस्तकालय बनाउने योजना नेपाल जर्नीले राखेको छ । यही लगानी जुटाउन डिसेम्बर ८ मा ग्रेपभाइनमा गाला डिनर राखिएको हो ।
गाला डिनरमा सहभागीता वापत एकसय डलर प्रवेश शुल्क राखिएको छ । डिनरमा खाने र मनोरञ्जनात्मक कार्यक्रममात्र हुनेछ ।
गत वर्षको गाला डिनरबाट संकलन भएको २७ हजार डलरमा यस वर्ष समेत थपेर प्रोजेक्ट यसैवर्षबाट सुरु गर्ने तयारीमा नेपाल जर्नी रहेको छ ।
नेपालमा बन्न लागेको पुस्तकालयका लागि अमेरिकाकै ग्रेपभाइनमा स्कुलमा पढ्दै आएकी श्रीयम जोशीले स्कुलमा साथीहरु मार्फत पाँचसय पुस्तक संकलन गरेकी छिन् । ती पुस्तकहरु उनले नेपाल जर्नीलाई डिसेम्बर ८ मै हस्तान्तरण गर्दैछिन् ।
प्रतिक्रिया