चितवन । तराई जिल्लामा उल्लासका साथ मनाइने छठ पर्व पछिल्लो समय चितवनको नारायणी नदी किनारमा पनि रौनकका साथ मनाउने गरिन्छ ।
चितवनमा छठपर्वमा व्रत बस्ने र सूर्यको आरधाना गर्ने भत्तजनहरु बढ्दै गएका छन् । अझै पहाडी समुदायका व्यक्तिहरु पनि छठमा व्रत बस्ने क्रम बढ्दै गएको हो ।
विसं २०४८ सालदेखि नारायणी नदी किनारमा छठ पर्व मनाइँदै आएको छ । सुरु सुरुका बर्षमा ४० जना व्रतालु पनि नहुने छठमा अहिले ५०० बढी व्रतालुहरु सहभागी हुनुले छठप्रतिको आर्कषण बढाएको देखिन्छ ।
छठपर्व मनाउन नारायणी नदी किनार सिंगारिएको छ । तराई सामुदायिक सेवा समिति नारायणगढले हरेक वर्ष छठपर्व यही नदी किनारमा मनाउँदै आएको छ ।
व्रतालुलाई टेन्टको व्यवस्था मिलाइएको छ । अर्घ दिने ठाउँमा नदी किनारमा कुनै पनि दुर्घटना नहोस् भनेर डोरीको बार बनाइएको छ । यहाँ २० देखि २५ हजार मानिसहरु छठपर्व हेर्नका लागि आउने गरेको तराई सामुदायिक सेवा समितिका अध्यक्ष गोपालजी गुप्ताले बताए । उनले छठ पर्वको महत्व तराई हुँदै पहाडसम्म फैंलिदै गएकोमा खुसी लागेको बताए ।
समितिले निरन्तर व्यवस्थित रुपमा छठ मनाउन थालेपछि यहाँ व्रत बस्ने र हेर्न आउनेहरुको संख्या बढ्दै गएको छ । अध्यक्ष गुप्ता भन्छन् ‘तराईबासीमात्रै होइन, पहाडी समुदायका पनि नदीमा स्नान गर्न आउँछन् । ’
समितिका सचिव नारदप्रसाद परिहस्त आस्था र विश्वासको धरोहरका रुपमा छठपर्व मनाउँदै आएको बताए । समितिले चार लाख रकम खर्चिएर नारायणी नदी किनारमा व्यवस्थित व्रतका लागि व्यवस्था मिलाउँदै आएको छ ।
छठको सुरक्षा र व्यवस्थापनका लागि ट्राफिक प्रहरी एवम् जनपथ प्रहरीलाई खटाउन अनुरोध गरिएको अध्यक्ष गोपाल जी गुप्ताले बताए ।
स्वस्फूर्तरुपमा आर्थिक सहयोग संकलन गर्ने गरिएको छ । नपुगेको रकम समितिभित्रकै सदस्यले हाल्ने गरेका छन् । नदी किनारमा १५ वटा टेण्ट बनाइएको छ । टेण्टभित्र करिब चार हजार ब्रतालु बसेर भजनकीर्तन गर्न मिल्छ । केही वर्षयता नदी किनार ठूलै मेलाजस्तो देखिने गरेको बताए ।
छठका बेलामा पहिला पहिला तराईका आफ्नै जिल्लामा वा घरमा जानेहरुपनि पछिल्लो समयमा यही नदी किनारमा व्रत बस्न थालेका छन् । सोही कारण हरेक बर्ष संख्या बढ्दै समितिका अध्यक्ष गुप्ताले बताए । नारायणी नदी किनारमा मंगलबार दिउँसोदेखि ब्रतालुको भीड लागेको छ । मूल विधि चतुर्थीदेखि सुरु भए पनि छठमा षष्ठीका दिन बेलुकी अस्ताउन लागेको र सप्तमीका दिन उदाउँदो सूर्यलाई अर्घ दिई पूजापाठ गरिन्छ ।
उज्यालो दिने, न्यानो तथा गर्मी दिने, रोगव्याधीबाट जोगाउने सूर्यनै भएकाले सूर्यको आराधना गर्दै छठ मनाउने गरिन्छ । चामल, पिठोको ठेकुवा, कसार, विभिन्न मिठाइ, उखु, अदुवालगायतका प्रसाद बाँसको टोकरी वा सुप्पोमा राखेर नजिकका जलाशयमा लगेर अस्ताउदो सूर्यलाई अघ्र्य दिने गरिन्छ ।
यस्तै बुधबार बर्तालुले उदाउँदो सूर्यलाई अर्घ दिएपछि छठपर्व समापन हुन्छ ।
पूर्वी चितवनको रत्ननगर क्षेत्रमा पनि छठपर्व धुमधामका साथ मनाइएको छ । रत्ननगरको गौमती गंगा किनार गौरीघाट, खैरहनीको बूढीराप्ती, पम्पाखोला, शान्तिबजारको ढुंग्रेखोलालगायत ठाउँ छठका लागि सिंगारिएका छन् । छठीमातालाई केरा, मुला, अदुवा, नरिवल, पान, सुपारी, नाङ्लो, ढकी, माटोको हात्ती किनमेलका लागि बजारमा भीड देखिन्छ ।
छठीमाई सेवा समिति रत्ननगरले प्रत्येक वर्ष रत्ननगर–२ स्थित महारुद्र शिवालय मन्दिर परिसर लौरीघोलमा रहेको गौरीघाट सिंगारिएको छ । सेवा समितिका सल्लाहकार महेशप्रसाद रौनियारले रत्ननगरबाट मनाउन सुरु गरिएको यो पर्व जिल्लाको अन्य ठाउँमा फैलदै गएको बताए ।
उनका अनुसार रत्ननगरको भोकाहामा करिब १५ जनाबाट यो पर्व मनाउन सुरु गरिएको थियो । अहिले रत्ननगरमा करिब २ सय घरधुरीले यो पर्व मनाएका छन् ।
प्रतिक्रिया