नवलपरासी । धन कमाउने सपना बोकेर साउदी अरब गएका कावासोती १२ का ३६ वर्षीय गणेश सापकोटा रोग बोकेर नेपाल फर्किएका छन् । नेपालमै केही गर्ने उत्साह बोकेर फर्किएका सापकोटाका दुवै मिर्गौला फेल भएका छन् ।
आफ्नो जीवनको लाऊँलाऊँ र खाऊँखाऊँ उमेर झन्डै १० वर्ष साउदीमा बिताएका सापकोटा अब नेपालमै केही गर्छु भनेर नेपाल फर्केपछि उनले आफू रोगी भएको थाहा पाएका हुन् ।
उनले भने, ‘बिस्तारै रोगले च्याप्न थाल्यो, के भएको रहेछ भनेर चेक गर्दा थाहा भयो, दुवै मृगौला फेल भएको रहेछ ।’ उनलाई अहिलेसम्म २/३ लाख आर्थिक सहयोग जुटेको छ भने सहयोग आउने तर्खरमा रहेसहित साढे ४ लाखको हाराहारीमा सहयोग जुटेको छ । सापकोटा भन्छन्, ‘उपचारका लागि अन्तिमसम्म गरेर १५/१६ लाख खर्च हुन्छ, तर कसरी जुटाउने ?’
सापकोटालाई उनका बुबा ६३ वर्षीय कृष्णप्रसाद सापकोटाले एउटा मिर्गौला दिने भएपछि उनले जीवनदान पाउने पक्का त भएको छ, तर खर्च जुटाउन अझै धौधौ परेको छ । सापकोटा भन्छन्, ‘साढे चार लाखको हाराहारीमा खर्च भइसकेको छ, ४÷५ दिनमा अप्रेसन हुने तयारी छ । अप्रेसन गर्ने दिन नै ३÷४ लाख खर्च लाग्छ, अझै जुट्न सकेको छैन ।’
३६ वर्षीय सापकोटाले १० वर्ष साउदीमा कमाएको पैसा घरको ऋण तिर्न, घरका बिरामी परिवारलाई उपचार गर्न र घरखर्च चलाउनमै सकिएको बताउँछन् । उनी भन्छन्, ‘परदेशको जीवनमा कति नै हुन्छ र कमाइ, घरखर्च चलाउनै प¥यो, घरमा अरु पनि बिरामी हुनुहुन्छ, कमाएको उपचार गर्दै खर्च भयो, अहिले म आफैँ बिरामी परेँ ।
सापकोटाले अहिले मानव अंग प्रत्यारोपण केन्द्र भक्तपुरमा उपचार गरिरहेका छन् । उनको स्वास्थ्य जाँच र खान–बस्नमै साढे चार लाख खर्च भएको छ ।
उनलाई अहिलेसम्म कतारमा रहेका नवलपरासीका युवाहरुले ३० हजार रूपैयाँ, चितवन घर भई हाल हङ्कङ बस्दै आएका कृष्ण गुरूङले एक लाख ६५ हजार रूपैयाँ सहयोग गरेका छन् ।
त्यस्तै, जापानमा रहेका नवलपरासीका युवाहरुले नवलपरासी समाज जापानद्वारा एक लाख ९ हजार रूपैयाँ पठाएको संयोजक यादव केसीले बताए । ३५ जना युवाहरुले उक्त रकम पठाएका हुन् । बुधबार जिल्ला प्रशासन कार्यालय नवलपुरमा उक्त रकम हस्तान्तरण गर्ने कार्यक्रम रहेको छ ।
त्यस्तै, उनी आफैँले खोलेको फेसबुक एमओसी ग्रुपबाट एक लाख १० हजार रकम उठेको उनले बताए । सापकोटाको उपचारका लागि उनकै नाममा रहेको राष्ट्रिय वाणिज्य बैंकको खाता नं ३२०००२८२१३१० मा रकम जम्मा गर्न सकिने छ ।
प्रतिक्रिया