प्रवास

भोट हाल्ने एउटै दलमा तर नेपालको राजनीतिलाइ लिएर मतभिन्नता

195 पटक पढिएको

- रामचन्द्र भट्ट

हिमालय खबर | 6th Nov 2018, Tuesday | २०७५ कार्तिक २०, मंगलवार १०:३७
ड्यालस (अमेरिका) – अमेरिकामा रिपब्लिक पार्टीका सदस्य रहेका राम सी पोखरेलले अघिल्लो साता फेसबुकमा एउटा स्टाटस लेखे । पोखरेलले लेखेको स्टाटस अमेरिकाको राजनीतिमा चासो राख्ने धेरैलाई बहशको विषय बन्यो ।
 
पोखरेलले टेक्सस सिनेटरका लागि आफूले टेड क्रुजलाईनै उपयुक्त देखेकोले भोट हाल्ने स्टाटस राखेका थिए । त्यो स्टाटसमा क्यालिफोर्नियाका रोजर अधिकारीदेखि लिएर न्यूयोर्कका रविन बज्राचार्यले कमेन्ट गरे ।
 
क्यालिफोर्नियाका रोजर अधिकारी डेमोक्रेट पार्टीका सदस्य हुन । डेमोक्रेटीक पार्टीको ट्रेसी कमिटीको नेतृत्व समेत गरिसकेका व्यक्तित्व हुन् अधिकारी । अधिकारीले अमेरिकाको समुन्नतिका लागि डेमोक्रेटीक पार्टी सबैभन्दा उपयुक्त रहेको धारणा राखे । 
 
यस पटककको अमेरिकी चुनावमा नेपाली समुदायको निकै चासो छ । चासो बढ्नुमा पहिलो त नेपाली मुलका व्यक्तिहरूले ठाउँठाउँमा उम्मेदवारी दिएका छन् । मेरिल्याण्ड राज्यको तल्लो सदनका लागि ह्यारी भण्डारी डेमोक्रेटिक पार्टीबाट चुनावी दाैडमा छन् । अन्य राज्यका सिटीहरूमा पनि नेपाली मुलका उम्मेदवारहरू प्रतिस्पर्धा गरिरहेका छन् । उनीहरूका उम्मेदवारीले पनि नेपाली समुदायलाइ विगतमा भन्दा यसपटक चुनाव लागेको छ ।
 
दोस्रो तथ्य हो, यसपटक मतदान गर्न योग्य अर्थात नागरिकता लिएका नेपालीहरू प्रशस्त छन् । टेक्ससको ट्यारेन्ट काउन्टीमा मात्र झण्डै एकहजार दुइसय नेपालीमुलका मतदाताहरू छन् । 
 
चुनावको दिनभन्दा पहिलेनै भोट हाल्न पाउने व्यबस्था अमेरिकामा गरिएको हुन्छ । जसलाई अर्लि भोटिङ भनिन्छ । धेरै नेपालीहरुले चुनावको दिनमा लाइन बसेर भोट हाल्नुभन्दा पहिलेनै गएर अर्लि भोटिङको समयमा आफु बसेको सिटीको पायक पर्ने स्थानमा पुगेर मतदान गरेका छन् ।
 
‘यसपटक पहिलेभन्दा धेरै नेपाली समुदायले मतदान गरेका छन्,’ ड्यालसको युलेसमा बस्दै आएका प्रभात दीक्षितले भने । दीक्षित आफै पनि नेपाली समुदायलाई मतदानमा जागरुक बनाउन यसपटक निकै खटिएका थिए । 
 
नेपाली समुदायका धेरैले डेमोक्रेट पार्टीमा मतदान गरेका छन् । समुदायका चिनिएकामध्य केहीले रिपब्लिकन पार्टीमा मत मागेर सकृयता देखाएका छन् । 
 
नेपालमा जुनसुकै पार्टीमा आवद्ध भएको, भोट हालेको विगत भएपनि अमेरिकामा भने डेमोक्रेट पार्टी रुचाउने र त्यसैलाई मत हाल्ने नेपालीको संख्या अत्यधिक छ । नेपाली कांग्रेस निकट रहेर राजनीति गरेको होस् या एमाले, चाहे राप्रपा । सबै दलका कार्यकर्ताहरु अमेरिकामा आएपछि धेरैजनाले डेमोक्रेट दललाई रुचाएको देखिन्छ ।
 
‘मलाई चाँही व्यक्तिगत रुपमा टेड क्रुजको ड्यासिङ पावर, व्यक्तित्व मन पर्छ,’ टेक्ससका पोखरेलले भने ।
 
उता नेपालमा छँदा एमालेको विद्यार्थी संगठनको केन्द्रिय नेतृत्वमै रहेर काम गरेका विजयराज भट्टराईले पनि डेमोक्रेट पार्टीको नीति मन परेका कारण मतदान गरेको बताए । 'हामी अाप्रवासीप्रति उदार नीति लिँदै अाएको छ डेमोक्रेट पार्टीले' भट्टराईले भने ।  
 
टेक्ससकै देवीप्रसाद अाचार्य रिपब्लिकन पार्टीको सदस्य छन् । विगत अाठ वर्षदेखि उनी रिपब्लिकन पार्टीमा अावद्ध भएर सकृय छन् । 'डोनाल्ड ट्रम्पलाइ मन पराएर त होइन, तर म पहिलेबाटै रिपब्लिकन पार्टीमा सकृय छु,' उनले भने । 
 
नेपालमा छँदा चाहे नेपाली कांग्रेसमा अावद्ध भएर राजनीति गरेको होस् या एमालेमा रहेर । राप्रपामै रहेर काम गरेकाहरूमध्य अधिकांशले अमेरिकामा भने डेमोक्रेटीक पार्टीलाइ रूचाउँछन् । ती मध्य कतिपयले डेमोक्रेटीक पार्टीमा अावद्ध भएर सकृयता पनि देखाइरहेका छन् । 
 
'मेरो पारिवारीक पृष्ठभूमिनै नेपाली कांग्रेस हो, मेरा बुबा कांग्रेसमा निकै सकृय हुनुहुन्थ्यो' क्यालिफोर्नियाका रोजर अधिकारीले भने । अमेरिकामा बसेपछि यहाँको समाजसँग मिक्सअप हुनुपर्ने, सकृय हुने बानीले गर्दा उनी डेमोक्रेट पार्टीमा सदस्य भएर सकृय भएका हुन् ।  
 
देवी अाचार्य लामो समयदेखि टेरेन्ट काउन्टीको मेम्बर छन् । अार्लिङटन सिटीमा बस्दै अाएका अाचार्यले अागामी दिनमा उम्मेदवारी दिने योजना समेत बनाएका छन् । 
 
नेपालमा जुनसुकै पार्टीमा रहेर काम गरेको, अावद्धता रहेपनि अमेरिकामा अाइसकेपछि दुइवटा विकल्पमात्र छन् । यात डेमोक्रेटिक पार्टी वा रिपब्लिकन । 
 
नेपालीहरू अमेरिकाका दुबै पार्टीमा अावद्ध छन् । तर नेपालको विचारधाराले यहाँको अावद्धता, संलग्नतामा कुनै फरक पारेको छैन । नेपालका चाहे नेका हुन् या वामपन्थी दुबै विचारधारा बोकेकाहरू अमेरिकामा डेमोक्रेटिक पार्टीमा सकृय छन् । अनि रिपब्लिकन पार्टीमा सकृय पनि छन् । 
 
अमेरिकामा रहेका कांग्रेस निकट जनसम्पर्क समिति र वामपन्थी निकट प्रवासी मञ्च दुबैका नेताहरूमध्य अधिकांशको झुकाव डेमोक्रेटिक पार्टीतिर छ । डेमोक्रेटिक पार्टीका नेताको चुनावी प्रचार प्रसारमा नेपालीहरू जुटेका छन् । भोट पनि डेमोक्रेटिकलाइ हाल्छन् । 
 
अमेरिकामा एउटै दलको कार्यकर्ता हुने, तर नेपालको दलीय विचारधारालाइ लिएर पानी बाराबारको अवस्था नेपाली समुदायबीचनै बेलाबखतमा देखिन्छ । यस्तो प्रवृत्तिलाइ कम गर्दै नेपाली समुदायको हितलाइ सहयोग गर्ने उम्मेदवारहरूलाइ सहयोग गर्नुपर्ने धारणाले अहिले विस्तारै स्थान पाउँदै गएको छ । 
 
अमेरिकामा भोट हाल्ने बेलामा एउटै दललाइ हाल्ने, यहाँ एउटै दलका शुभेच्छुक छन् । तर नेपालको राजनीतिक दल र विगतको संबद्धतालाइ लिएर बिभाजन, गालीगलाैज ठीक होइन । यसलाइ सुधारेर अब नेपाली समुदाय यहाँ जुन दलमा लागेपनि एक भएर अघि बढेमा अमेरिकामा रहेका समुदायले छिट्टैनै प्रभाव देखाउन सक्ने धारणा समुदायका अगुवाहरूको छ ।तस्बिर : सामाजिक संजाल