अस्टिन (टेक्सस) – गैर आवासीय नेपाली संघ (एनआरए) टेक्सस च्याप्टरले नेपाली भाषामै ड्राइभिङ लाइसेन्सको परिक्षा दिन पाउने व्यबस्थाका लागि टेक्सस राज्य सरकारसँग आग्रह गरेको छ ।
एनआरएन टेक्सस च्याप्टरका अध्यक्ष भानु खरेल लगायतका पदाधिकारीहरुको टोलीले मंगलबार टेक्ससका सेक्रेटरी अफ स्टेट रोनाल्डो पाब्लोसलाई भेटेर उक्त आग्रह गरेका हुन् । संघले टेक्ससमा एकलाख नेपालीभाषीहरुको बसोबास रहेको हुँदा सहजताका लागि नेपालीभाषामै ड्राइभिङ लाइसेन्स परिक्षा दिन पाउने व्यबस्था गरिदिन माग गरेको हो ।
टेक्ससको ड्यालस÷फोर्टवर्थ, अस्टिन, ह्युस्टन, सानएन्टेनियो, लबक लगायतका शहरहरुमा नेपालीहरुको बाक्लो बसाई छ । नेपाली समुदायले अंग्रेजी माध्यममै ड्राइभिङ परिक्षा दिनुपर्दा धेरैलाई समस्या परेको उल्लेख गर्दै एनआरएन टेक्ससले नेपालीभाषामै व्यबस्था गर्न आग्रह गरेको हो ।
अमेरिकाको मेरिल्याण्ड राज्य सरकारले नेपालीभाषामै ड्राइभिङ लाइसेन्सको परिक्षा दिन पाउने व्यबस्था गरिसकेको छ ।
प्रतिक्रिया