चितवन । नारायणी नदीले पश्चिम चितवनको न्युरे चोकमा लगाइएको तटबन्ध भत्काएपछि एक हजारभन्दा बढी घर उच्च जोखिममा परेका छन् ।
भरतपुर महानगरपालिका–२७ र २८ को बीचमा एकसय मिटर तटबन्ध बगाएर नदीले छेउको जमिन कटान गरेपछि त्यसबाट एक हजार २०० घर उच्च जोखिममा रहेको चितवनका प्रमुख जिल्ला अधिकारी जीतेन्द्र बस्नेतले जानकारी दिए ।
नदी कटान बढेपछि नजिकैका दुई घर स्थानान्तरण गरिएको र अन्य केही घर स्थानान्तरण गर्ने क्रममा रहेको उनले बताए । नदीले कटान गरिरहेका ठाउँमा तारजाली र बोरामा बालुवा, ढुङ्गा, गिट्टी भरेर नियन्त्रणको प्रयास भइरहेको छ ।
मंगलबार बिहान अकस्मात् नदीले तटबन्ध बगाएपछि भरतपुर महानगरपालिकाका प्रमुख रेनु दाहालको नेतृत्वमा प्रजिअ बस्नेतसहित सुरक्षा निकायका प्रमुखलगायत प्रभावित ठाउँमा पुगेका थिए ।
सो ठाउँमा अहिले सेना, सशस्त्र प्रहरी, नेपाल प्रहरी, नगरप्रहरी, स्थानीयलगायतले नदी नियन्त्रणमा लागिपरेको प्रमुख दाहालले बताइन् । नदी पसेमा वडा नं २८ का सम्पूर्ण बस्ती पूर्णरुपमा प्रभावित हुने भएकाले सतर्क रहन प्रशासनले सूचना जारी गरेको हो । जिल्ला प्रशासन कार्यालय चितवनले नारायणी नदीको कटानबाट प्रभावित बस्तीहरुलाई सुरक्षित हुन मंगलबार अनुरोध गरेको छ ।
प्रशासकीय अधिकृत रामचन्द्र ढकालले जारी गरेको सूचनामा भरतपुर महानगर २८ का साविक मेघौली १, २ र ३ का सालबास, सिसाबास पर्साबजार, लौखरी, गोलाघाट र अनौली आसपासका बस्तीहरुमा बाढी पस्ने सम्भावना देखिएकाले सुरक्षित रहन अनुरोध गरिएको छ ।
प्रतिक्रिया