मनोरञ्जन

'नाइ नभन्नु ल–५' ले अमेरिकामा एकसय शो गर्दै

489 पटक पढिएको

हिमालयखबर संबाददाता | 26th Aug 2018, Sunday | २०७५ भाद्र १०, आईतवार १८:५१
 
ड्यालस (टेक्सस) – कथावस्तु फरक भएपनि धारावाहिक रुपमा निर्माण भइरहेको नेपाली चलचित्र ‘नाई नभन्नु ल–५’ यही सप्ताहन्तदेखि अमेरिकाभरि प्रदर्शनमा आउने भएको छ । 
 
आइतबार ड्यालसमा पत्रकार सम्मेलनको आयोजना गरेर निर्माताद्वय हरिबोल भण्डारी र गौरीराज जोशीले अमेरिकाभरि नेपाली समुदायको बाक्लो उपस्थिती भएको स्थानमा फिल्मलाई प्रदर्शन गर्ने जानकारी दिए । आउँदो शुक्रबारदेखि ड्यालसका दुई हलमा ‘नाई नभन्नु ल–५’ एकै साथ प्रदर्शन हुँदैछ ।
 
ड्यालसका अतिरिक्त लसएन्जलस, सानफ्रान्सिस्को, डेनभर, भर्जिनिया, न्यूयोर्क, ह्युस्टन, अस्टिन, बाल्टिमोर, सियाटल लगायतका स्थानहरुमा यो फिल्मलाई प्रदर्शन गरिनेछ । अमेरिकाभरिमा कम्तिमा एकसय शो प्रदर्शन गरिने फिल्म वितरणको जिम्मा लिएको ‘नेपाल–११ इन्टरटेनमेन्ट’ ले जनाएको छ ।
 
गत शुक्रबारदेखि नेपालमा प्रदर्शन सुरु भएको नाई नभन्नु–५ ले निकै राम्रो प्रतिकृया पाएको छ । पहिलो दिन ४६  लाख अल नेपाल ओपनिङ कलेक्सन गरेको थियो भने शनिबार एक करोड २ लाख कलेक्सन गरेको छ ।
 
अर्थात शनिबार मात्रै फिल्मले मोफसल तर्फ ४९ लाख ८१ हजार र राजधानीका २४ वटा हलबाट  ५२ लाख १९ हजार कारोबार गरी कूल १ करोड २ लाख बराबरको कारोबार गरेको हो ।
 
‘तपाइहरूले सबैले नेपाली फिल्मलाइ हेरिदिनुभयो भने प्रत्यक्ष र अप्रत्यक्ष दुबैरूपमा नेपाललाइ फाइदा हुनेछ, भण्डारीले भने । नेपाली मुभीलाइ विदेशमा रहेका नेपालीहरूले हेरिदिने र प्रतिकृया दिने हो भने त्यसबाट नेपालमा गुणस्तरीय चलचित्रहरू बन्नसक्ने धारणा भण्डारीको थियो ।
 
अर्का निर्माता तथा एनआरएन अमेरिकाजका क्षेत्रीय संयोजक गौरीराज जोशीले पनि नेपाली कला, संस्कृतिलाइ सहयोग गर्नका लागि फिल्मी क्षेत्रमा लगानी गरेको बताए । जोशीले विदेशमा रहेका नेपालीहरूले गुणस्तरीय फिल्म प्रति रूची देखाएकोले नाइ नभन्नु ५ बाट त्यो चाहना पुरा हुने समेत बताए ।
 
‘हामी यो फिल्मबाट हुने आम्दानीको केही हिस्सा नेपालमा सामुदायीक सेवामा समेत लगानी गर्नेछौँ,' उनले भने । फिल्मी क्षेत्रमा जोशीको यो पहिलो लगानी हो । भण्डारीले पनि यसअघिनै दुइ वटा फिल्ममा लगानी गरिसकेका छन् । 
 
पत्रकार सम्मेलनमा नेपाल–११ इन्टरटेनमेन्टका प्याट्रिक सुवेदीले नेपाली समुदायले गुणस्तरीय र मनोरञ्जनात्मक नेपाली चलचित्रको खोजी गरिरहेको र त्यसको माग अमेरिकामा बढी रहेको उल्लेख गरे । उनले आफ्नो कम्पनी स्थापना भएको छोटो अवधिमै ६ वटा नेपाली फिल्म अमेरिकामा प्रदर्शन गरिसकेको समेत बताए । ती मध्य सबैभन्दा बढी शत्रुगतेको ड्यालसमा ५० वटा शो भएको थियो । 
 
डेढ करोड रूपैँयाको लगानीमा तयार भएको नाइ नभन्नु ल–५ पछि गैर आवासीय नेपालीहरूले फिल्मको क्षेत्रमा अझै आक्रामक रूपमा लगानी बढाउने योजना रहेको सुनाए । ‘नेपाली दर्शकहरूले मन पराइदिनुभयो, उत्साह दिनुभयो भने हामी गैर आवासीय नेपालीहरूले संस्थागत रूपमै यो क्षेत्रमा लगानी गर्नेछौँ,' भण्डारीले भने ।
 
कार्यक्रमको सञ्चालन नेपाल इन्टरटेनमेन्टकी अदिती खरेलले गरेकी थिइन् । त्यस अवसरमा नेपाली समाज टेक्ससका अध्यक्ष सुमन थापा, पूर्व अध्यक्ष कृष्ण लामिछाने, एनअारएन अमेरिकाका पदाधिकारीहरू, सल्लाहकार, जनसम्पर्क समितिका पदाधिकारीहरूको उपस्थिती थियो । 
 
नाइ नभन्नु ल–५ मा प्रियंका कार्की, केकी अधिकारी, स्वस्तिमा खड्का, दिलिप रायमाझी, बुद्धी तामाङ, अनुभव रेग्मी, सेड्रिना शर्मा, जयनन्द लामा लगायतका कलाकारहरुले अभिनय गरेका छन् । यो सिनेमा मार्फत नायिका निरुता सिंह छोटो भुमिकामा भए पनि देखिदैछिन् । सिनेमामा बसन्त सापकोटाको संगीत, पुरुषोत्तम प्रधानको छायांकन र अर्जुन जिसीको सम्पादन रहेको छ ।