सानफ्रान्सिस्को (क्यालिफोर्निया) – उत्तरी क्यालिफोर्नियामा आइतबार सम्पन्न धार्मिक महोत्सवको क्रममा लगाइएको महापुराणबाट १० लाख १२ हजार डलर सहयोगको प्रतिवद्धता व्यक्त भएको छ ।
सामुदायिक भवन बनाउने उद्वेश्यले आयोजित महोत्सवको अन्तिम दिन आइतबारसम्म व्यक्ति तथा संस्थागत रुपमा यो १० लाख १२ हजार सहयोगको प्रतिवद्धता व्यक्त भएको हो । यो रकमबाट बे एरियामा मन्दिर सहितको सुविधा सम्पन्न सामुदायिक भवन बनाउने योजना आयोजक संस्थाहरुको छ ।
महापुराणको अन्तिम दिनसम्म सबैभन्दा बढी एकलाख एकहजार डलर सहयोग गर्ने घोषणा जनसम्पर्क समिति नर्दन क्यालिफोर्नियाले गरेको छ । समितिले आफ्ना सदस्यहरु मार्फत उक्त रकम दिने घोषणा गरेको हो ।
व्यक्तिगत रुपमा सबैभन्दा बढी सहयोग यज्ञलाल श्रेष्ठले दिने घोषणा गरेका छन् । उनले ५५ हजार डलर दिने घोषणा गरे । त्यस्तै दिक्पाल केसी ले ३९ हजार, राजेश थापाले ३३ हजार ३ सय , यज्ञ नेपालले २७ हजार ८ सय सहयोगको प्रतिवद्धता जनाएका छन् ।
सामुदायिक भवन निर्माण समितिका संयोजक एवं न्यान्सका पूर्व अध्यक्ष उत्तम कार्कीका अनुसार अपेक्षा गरिएभन्दा पनि बढी सहयोग संकलन भएको छ ।
पण्डित दीनवन्धु पोखरेलले सातदिनसम्म महापुराण वाचन गरेका थिए । अमेरिकामा महापुराण लगाएर सामुदायिक भवन बनाउने निकै राम्रो प्रतिस्पर्धा चलेको छ ।
प्रतिक्रिया