ड्यालस (टेक्सस) – घरबार बिहिन अमेरिकनहरुलाई समय समयमा खानेकुरा र अत्यावश्यकीय वस्तुहरु वितरण गर्दै आएको एचडीएनपी नेटवर्कले आउँदो डिसेम्बर १ मा गाला डिनर आयोजना गर्ने भएको छ ।
सहायता बिहिनहरुलाई सहयोग गर्दै आएको एचडीएनपीले उक्त कार्यका लागि सहयोग जुटाउन गला डिनर गर्न लागेको हो । सामाजीक कार्यमा सहयोगका लागि कोष जुटाउन गरिने भोज सहितको कार्यक्रमलाई गाला डिनरका रुपमा लिइन्छ ।
एचडीएनपीका संस्थापक देबी (डेभिड) आचार्यका अनुसार आउँदो डिसेम्बर १ तारिक हिल्टन गार्डेन इनमा गाला डिनर आयोजना हुनेछ । कार्यक्रममा सहभागी भएर रमाईलोका साथै सामाजीक कार्यमा सहयोग गर्न आचार्यले अनुरोध गरेका छन् ।
एचडीएनपीले अमेरिकामा रहेका घरबार बिहिनहरुलाई समय समयमा खाना ख्वाउनुका साथै उनीहरुलाई दैनिक जीवनमा आवश्यक सामानहरु निशुल्क वितरण गर्दै आएको छ । त्यस्तै घरवार विहिनहरुलाई हेल्थक्याम्प, रोजगारीका लागि सहयोगका अतिरिक्त रक्तदान कार्यक्रम पनि सञ्चालन गर्दै आएको छ ।
‘घरवार विहिनहरुलाई आत्मनिर्भर बनाउँ’ भन्ने नारा लिएर काम गरिरहेको एचडीएनपीले गाला डिनरमा सहभागी भएर सहयोग गर्न अपिल समेत गरेको छ । संस्थाले स्पोन्सरशीप गर्न चाहने संस्था, व्यबसायीक प्रतिष्ठान तथा व्यक्तिहरुमा समेत आग्रह गरेको छ । स्पोन्सरशीप गर्न चाहनेले देवी आचार्य, आइसा ओझा र सुजिता श्रेष्ठसँग सम्पर्क राख्न सकिने एचडीएनपीले जनाएको छ ।
प्रतिक्रिया