काठमाडौँ ।नेपाल कम्युनिस्ट पार्टीका प्रवक्ता नारायणकाजी श्रेष्ठले पदबाट राजीनामा दिएका छन् । डा केसीको सत्याग्रह चरमोत्सकर्षमा पुगेका बेला साउन ६ गते त्रिवि शिक्षण अस्पताल महाराजगन्ज पुगेर भेटवार्ता गरेपछि प्रधानमन्त्री केपी शर्मा ओली र अध्यक्ष प्रचण्डले स्पष्टीकरण मागेपछि श्रेष्ठले पदबाट राजीनामा दिएका हुन् ।
डा केसी समर्थक केहीलाई आफ्नै निवासमा बोलाएर केसीका माग कसरी पूरा गर्न सकिन्छ भन्ने बारेमा नेता श्रेष्ठले कुराकानी गरेका थिए । श्रेष्ठले केसीलाई भेटेको दोस्रो दिन नेकपाका नेताहरु बाुलवाटारमा केसीको मागको बारेमा छलफल गर्न जम्मा भएका थिए । जहाँ प्रचण्ड र ओलीले हामीलाई नसोधी डा केसी, सुशीला कार्की, कृष्ण पहाडीलगायत कांग्रेसका नेतालाई भेट्न किन गएको रु भनेर हप्काएका थिए ।
नेता श्रेष्ठ यसअघिका सत्याग्रहमा पनि डा। केसीकै पक्षमा उभिएका नेता हुन् । गत जेठ ३ गते तत्कालीन नेकपा एमाले र नेकपा माओवादी केन्द्रबीच एकता हुँदा एकीकृत पार्टीको प्रवक्ताको जिम्मेवारी पाएका श्रेष्ठले तीन महिना नपुग्दै राजीनामा दिएका हुन् ।
तत्कालीन माओवादी केन्द्रका वरिष्ठ नेतासमेत रहेका उनी पार्टी एकताका लागि सक्रिय रहेका थिए । पार्टी एकता गर्दा ९ सदस्यीय सचिवालय बनाउँदा पद थप गरी तत्कालीन एमालेका तर्फबाट विष्णु पौडेललाई महासचिव र उनलाई प्रवक्ताको जिम्मेवारी दिइएको थियो ।
एकता अगाडि पार्टीमा दुई अध्यक्षबाहेक अन्य पदाधिकारी नबनाउने तयारी भए पनि अन्तिममा यी दुई पद सिर्जना गरिएको थियो । तर, पार्टी एकताको ३ महिना नबित्दै श्रेष्ठले पदबाट राजीनामा दिएका हुन् ।
पार्टी अध्यक्ष तथा प्रधानमन्त्री केपी शर्मा ओलीले पार्टी सञ्चालनको लागि समय नदिएको भन्दै उनी पार्टी अध्यक्षप्रति असन्तुष्ट थिए । उनले पछिल्लो पार्टीका दुई अध्यक्षले अनशनरत चिकित्सक गोविन्द केसीविरुद्ध सरकारको प्रतिरक्षा गर्न दिएको निर्देशन उल्लंघन गरेको भन्दै पार्टी अध्यक्षहरू उनीप्रति असन्तुष्ट रहेका थिए ।
अनशनरत गोविन्द केसीको अनसन तोडाउन महत्वपूर्ण भूमिका खेलेका उनले सरकारले केसी पक्षसँग वार्ता गर्नुअगाडि नै त्रिवि शिक्षण अस्पतालमा पुगेर केसीलाई भेट गरेका थिए ।
पार्टी सचिवालय सदस्यसमेत रहेका उनलाई दुई अध्यक्षहरू ओली र प्रचण्डले स्पष्टीकरण सोधेपछि उनले पदबाट राजीनामा दिएका हुन् । उनको राजीनामाले नेकपाभित्र भूँइचालो गएको अनुभूति राजनीति वृत्तमा हुन थालेको छ ।
उनको राजीनामा फिर्ता गर्न आग्रह भइरहँदा प्रवक्ता श्रेष्ठले भने बुधबार राजीनामा दिएको पुष्टि गर्दै राजीनामा फिर्ता लिने मुडमा नरहेको बताएका छन् ।उनले भने, “म अहिले पनि पार्टीको काममा सक्रिय छु । तर, प्रवक्ताबाट राजीनामा दिएको हुँ । तर, मेरा बारेमा अनावश्यक हल्ला फैलाइएको छ । म राजीनामा फिर्ता लिने मुडमा भने छैन ।”
प्रतिक्रिया