एजेन्सी । रसियामा जारी विश्वकप फुटबलको समूह ‘ई’ को खेलमा ब्राजिलले कठिन र रोमाञ्चक जित हासिल गरेर समर्थकलाई खुसी पारेको छ ।
सुरुवाती समयदेखि नै बल नियन्त्रणमा लिएको ब्राजिलले दर्जनौँ अवसरलाई गोलमा परिणत गर्न चुकेको थियो । पूरा खेल सकिन लाग्दासमेत दुवै टीमले गोल गनृ नसक्दा ब्राजिलका करोडौँ समर्थक बेचैन बनेका थिए । तर, हिरोको खेल अन्तिममा हुन्छ भनेझैँ ब्राजिलले कोस्टारिकाविरुद्ध २–० गोलको कठिन जित हात पारेको छ ।
ब्राजिलले दुवै गोल थप गरिएको समयमा गरेको थियो । ब्राजिलको जितमा नेयमारले खेल सकिन केही सेकेन्ड बाँकी रहँदा गोल गरे । त्यस्तै, ब्राजिलका लागि फिलिपे कौन्टिन्होले अन्तिम समयमा गोल गरेका थिए । उनले थप गरिएको अतिरिक्त समयमा गोल गर्दै ब्राजिललाई जित दिलाएका हुन् । ब्राजिलले सुरुवाती समयदेखि नै बल नियन्त्रणमा लिएको थियो ।
एकपछि अर्को प्रहार गरेको ब्राजिलले राम्रो अवसर पाए पनि थप गोल गर्न सकेन । कोष्टारिकाका गोलकिपर केयलोर नभासले उत्कृष्ट बचाउ गरेका थिए । पहिलो हाफको मध्य समयतिर नेयमारले वान भर्सेस वानमा गोल गर्ने अवसर पाएका थिए । तर, उनी बारम्बार चुकेका थिए ।
ब्राजिलका फरवार्ड नेयमारले ४ पटक कोष्टारिकाको पोष्ट नजिकैबाट फ्रि किक प्रहार गरेका थिए । तर, उनको फ्रि किक सशक्त हुन सकेन । पहिलो हाफसम्म दुवै टिमले बराबरी खेल खेलेका थिए ।
खेलको ५० औं मिनेटमा ब्राजिलले गोल गर्ने सुन्दर मौका खेर फालेको थियो । खेलको ५६औं मिनेटमा नेयमारले प्रहार गरेको बल कोष्टारिकाका गोलकिपरले उत्कृष्ट बताउ गरेका थिए । खेलको ५८ औं मिनेटमा कोष्टारिकाका गोलकिपरले पुनः एकपटक राम्रो बचाउ गरेका थिए ।
पटकपटकको पोष्ट चार्ज असफल भए पनि अन्तिममा नेयमारले समर्थक र आफ्नो टीमलाई निरास पारेनन् । २ गोलले विजयी भएपश्चात् नेयमार भावुक भएर निकैबेर रोएका थिए ।
यो जितसँगै ब्राजिलले महत्वपूर्ण ३ अंक बटुलेको छ । ब्राजिलको २ खेलमा १ खेलमा जित र १ खेलमा बराबरी खेल्दै ४ अंक भएको छ । पराजित कोष्टारिका भने समूह चरणबाटै बाहिरिने खतरा बढेर गएको छ ।
प्रतिक्रिया