चितवन । जापानमा रहेर परोपकारी कार्यमा लागिपरेका चितवन रत्ननगरका दीपक नेपालको सक्रियतामा गामबेँसीको चेपाङ संरक्षण केन्द्रका लागि बुधबार सहयोग रकम हस्तान्तरण गरिएको छ ।
जापानमा रहेका दीपकको जन्मदिनको अवसरमा उनकी आमा टीकाकुमारी नेपालले केन्द्रका अध्यक्ष केपी किरण शर्मालाई ९२ हजार ४४० रुपैयाँ हस्तान्तरण गरेकी हुन् ।
सो रकम दीपकको सक्रियतामा जापानमा प्रदर्शनी गरिएको चलचित्र कोहलपुर एक्सप्रेसको टिकट बिक्रीबाट संकलित रकम चेपाङ बालबालिकाको हितमा खर्च गर्ने गरी हस्तान्तरण गरिएको आमा टीकाकुमारीले बताइन् ।
परोपकारी मन भएका दीपकले चेपाङ केन्द्रको स्थापनाकालमा आवास निर्माणका लागि २ लाख ५५ हजार रुपैयाँ जापानमा संकलित गरी पठाएको केन्द्रका अध्यक्ष शर्माले स्मरण गरे । दीपकले चरणवद्ध रुपमा सहयोग गर्दै आएको उनले बताए ।
केन्द्रमा १२५ जना चेपाङ बालबालिका आवासीय सुविधाका साथ अध्ययन गरिरहेका छन् ।
यसैबीच, दीपक नेपालको जन्मदिनको अवसर पारेर खैरहनी माविको छात्रवृत्ति अक्षयकोषका लागि आमा टीकाकुमारीले १ हजार २२५ रुपैयाँ अभियानका अध्यक्ष मुरलीप्रसाद गजुरेललाई हस्तान्तरण गरिन् ।
जन्मदिन तथा शुभकार्य र पुण्यस्मृतिका अवसरमा संकलन गरिएको अक्षयकोषमा हालसम्म ८० लाख रुपैयाँ संकलन भएको अध्यक्ष गजुरेलले बताए ।
यही वर्षभित्र अक्षयकोषको रकम वृद्धि गरी एक करोड रुपैयाँ पु¥याउने अभियानमा आफू लागिपरेको उनले बताए ।
प्रतिक्रिया