बिजनेस

नारायणगढ–मुग्लिन सडक सञ्चालनले पर्यटन व्यवसायीमा उत्साह

97 पटक पढिएको

7th Jun 2018, Thursday | २०७५ जेष्ठ २४, बिहीवार ००:५६
चितवन । नारायणगढ–मुग्लिन सडकको पहिलो तहको कालोपत्रे सकिएर दिनको समयमा रोकिएको आवागमन सञ्चालन भएकाले पर्यटन व्यवसायी उत्साहित भएका छन् । 
 
दिनको समयमा छ घण्टा सडक बन्द हुने र साँझ बिहान सडकको खाल्टाखुल्टीका कारण घण्टौँ सवारी साधन जाममा बस्नु पर्दा पर्यटकले गन्तव्य परिवर्तन गर्दै आएका थिए । 
 
क्षेत्रीय होटल संघका अध्यक्ष सुमन घिमिरेका अनुसार काठमाडौँ, पोखरालगायतका ठाउँबाट आएका पर्यटक १५ घण्टासम्म जाममा परेपछि रुष्ट हुँदै आएका थिए । उनीहरुका लागि बनाइएका कार्यक्रमसमेत प्रभावित भएकाकारण चितवन आउने पर्यटक पोखरातर्फ जाने गरेका थिए । 
 
घिमिरेका अनुसार बाटोकै कारण १५ देखि २० प्रतिशत पर्यटक घटेका थिए । तीन वर्षअघि यो सडक विस्तार थालेसँगै सडक प्रभावित हुँदै आएको थियो । क्षेत्रीय होटल संघका वरिष्ठ उपाध्यक्ष दीपक भट्टराईले बाटोका कारण पर्यटक बस बिहान ७ः३० बजे नै छुट्ने भएपछि एक दिन बस्न आएका पर्यटकको बिहानमा गर्न सकिने हात्ती सफारी वा बोटिङ छुट्ने गरेको थियो । सौराहाबाट काठमाडौँ जाने बसको समय पनि असार १ गतेदेखि ८ः३० देखि ९ बजे छुट्ने गरी व्यवस्था मिलाउन लागिएको उनले बताए । 
 
सडक सहज हुँदै गर्दा पर्यटक बढ्ने निश्चित भएको उपाध्यक्ष दीपक भट्टराईको भनाइ थियो । रेष्टुरेन्ट एण्ड बार एशोसिएसन नेपाल सौराहाका अध्यक्ष गोकर्ण गिरीले नियमित सडक सहज बनेर २४सै घण्टा यातायात सञ्चालन भएसँगै चितवन आउने पर्यटकको संख्या बढ्न थालेको छ भने । 
 
बाटोका कारण काठमाडौँ, पोखरालगायतका क्षेत्रबाट आउने नेपाली तथा विदेशी पर्यटक प्रभावित भएकाकामा अब सहज हुन थालेको जानकारी उनले दिए । सो सडकको पहिलो तह कालोपत्रे सकेसँगै सडकमा धुलो र खाल्टाखुल्टी छैनन् । भित्तो काटिएको ठाउँबाट पहिरो रोक्ने काम भइरहेको छ । 
 
ठूलो वर्षात्मा पहिरो खस्ने जोखिम रहेको भए पनि अन्य समयमा भने सडक सहज भएको छ ।