पूर्वी चितवनको खैरहनी नगरपालिका ९ सुर्तनीमा बर्डफ्लु देखिएको छ । स्थानीय किसान राजन चौधरीले पालेका लेयर्स फार्मको १५ सय कुखुरा मरेपछि परीक्षण गर्दा बर्डफ्लुको पुष्टि भएको हो । यसअघि ०७० सालमा बर्डफ्लुको प्रकोप बढेको थियो ।
चौधरीको पोल्ट्री फार्मको मरेका कुखुरा परीक्षण गर्दा एच५एन१ (एभिएन इन्फ्लुएन्जा)नामक भाइरस पुष्टि भएको राष्ट्रिय पंक्षी रोग अन्वेषण प्रयोगशाला चितवनका वरिष्ठ पशु चिकित्सक डा. दयाराम चापागाईंले जानकारी दिए ।
चौधरीले एउटै फार्ममा १५ सय लेयर्स कुखुरा पालेका थिए । खोरमा रहेका कुखुरा भटाभट मर्न थालेपछि वैशाख १४ गते परीक्षणका लागि भरतपुरस्थित राष्ट्रिय पक्षी रोग अन्वेषण प्रयोगशाला पठाइएको थियो । वैशाख ३१ गते कुखुरामा बर्डफ्लु भेटिएको रिपोर्ट आए पनि बिहीबारमात्रै मन्त्रिस्तरीय निर्णयबाट कुखुरा नष्ट गर्न निर्देशन आएको उनले बताए ।
सरकारले कुखुरा मार्न निर्देशन दिएलगतै राष्ट्रिय पक्षी रोग अन्वेषण प्रयोगशाला चितवन र जिल्ला पशु सेवा कार्यालय भरतपुरका डाक्टर, प्राविधिकसहितको रेपिट रेन्सपोन्स टिम सुर्तनीको थारुबस्तीमा पुगेर प्रभावित फार्मको सरसफाइ गरी प्रभावित क्षेत्रमा औषधि छर्किएको छ ।
राजन चौधरीको खोरसँगै जोडिएको लक्ष्मण चौधरीको खोरका एक हजार कुखुरा मरेपछि परीक्षणका लागि सेम्पल पठाइएको डा चापागाईंले बताए ।त्यसको रिपोर्ट भने आउन बाँकी छ । राजनकै खोरनजिक लक्ष्मणको खोर रहेकाले उनले पालेका कुखुरा पनि बर्डफ्लुकै कारण मरेको हुनसक्ने अनुमान गरिएको छ ।
बर्डफ्लु संक्रमित क्षेत्र घोषणा
बर्डफ्लु पुष्टि भएपछि खैरहनी ९ सुर्तनीको केही भागलाई संक्रमित क्षेत्र घोषणा गरिएको छ । सो गाउँका हाँस, कुखुरा नष्ट गर्न थालिएको छ । उक्त क्षेत्रमा पक्षी तथा पक्षीजन्य पदार्थको ओसारपसारमा पनि रोक लगाइएको छ । त्यस क्षेत्रमा रहेका पक्षीलाई सुरक्षितरुपमा नष्ट गरिएको छ ।
पशु सेवा कार्यालय चितवनले कुखुराका खोरहरु सफा गर्न अनुरोध गरेको छ । यो भाइरस मानिसमा पनि सर्न सक्ने भएकाले सतर्कता अपनाउन सर्वसाधारण समक्ष कार्यालयले आग्रह गरेको छ ।
सुर्तनीको थारुबस्ती नजिकै व्यावसायिक रुपमा कुखुरा पालन गर्ने दर्जन बढी ठूला पोल्ट्री फार्महरु सञ्चालित छन् । अन्य फार्ममा बर्डफ्लुको संक्रमण रहे नरहेको पत्ता लगाउन स्थानीय ५ वटा पोल्ट्री फार्मबाट परीक्षणका लागि २२ वटा नमुना ल्याइएको डा. चापागाईंले बताए ।
नेपालको पोल्ट्री व्यवसायमा ७० अर्ब रुपैयाँको हाराहारीमा लगानी भएको छ । जसको ६० प्रतिशत हिस्सा चितवनले ओगटेको बताइन्छ ।
प्रतिक्रिया