हिमालय खबर संवाददाता-
काठमाडौँ । वैशाख ९ गते पार्टी एकता हुने उद्घोष गरेका प्रधानमन्त्री एवम् एमाले अध्यक्ष केपी शर्मा ओली र माओवादी केन्द्रका अध्यक्ष पुष्पकमल दाहाल प्रचण्ड नै पार्टी एकताका विषयमा अलमलमा परेका छन् ।
पार्टी एकता घोषणा गर्ने भनिएको दिनमा एकताको कुनै संकेत नै नभेटिएपछि नेकपा माओवादी केन्द्रका अध्यक्ष प्रचण्डले अब नभनेको दिनमा पार्टी एकता हुने बताएका छन् ।
पार्टी एकता संयोजन समितिले गरेको कार्यक्रममा सम्बोधन गर्दै उनले अलिकति खटपट हुनुलाई अविश्मरणीय परिघटनाका रुपमा लिन आग्रह गर्दै यसबाट शिक्षा लिनुपर्ने बताए ।
पार्टी एकता संयोजन समितिको कार्यक्रम स्थलमा लेनिन जयन्तीका दिन कार्यक्रम आयोजना गरे पनि व्यानरमा लेनिनकै तस्बिर नभएको भन्दै माओवादी केन्द्रका कार्यकर्ताले चर्को नाराबाजी गरे । मञ्चमा टाँगिसकिएको व्यानर झिकेर अर्को व्यानरसमेत राखिएको थियो ।
एकताबारे बलियो सन्देश दिन आयोजना गरिएको कार्यक्रममा दुईवटा व्यानर हुन पुगेपछि कार्यक्रम खल्लोमात्र भएन । प्रचण्ड र ओली कटाक्षमा उत्रिए ।
प्रचण्डले पार्टी घोषणाको अन्तिम तयारीमा रहेको र दह्रो संकल्प रहेको भन्न छुटाएनन् । अब मैले र केपीले दायाँबायाँ गरे पनि जनताले छुट दिँदैनन् भनेर व्यंग्यसमेत प्रहार गरे ।
उनले भने, “सम्मानजनक ढंगले एकता गर्ने हो, विभेद र अपमानित हुनका लागि होइन । समानताको सिद्धान्त र आधारमा, न्यायोचित किसिमले पनि एकता गर्नुपर्ने हुन्छ ।”
प्रचण्डको भनाइले माओवादी केन्द्रले राख्दै आएको अडानकै प्रतिबिम्बित गरेको थियो । सम्मानजनक र समानताको सिद्धान्तको सोझो अर्थ बराबरी हैसियत हो ।
प्रचण्डले अहिले एमाले र माओवादीलाई भिडाउने प्रयास जारी रहेको आरोप लगाउँदै त्यस्ताबाट बच्नुपर्ने धारणा राखे । उनले भने, “एमालेलाई सिध्दिन लागेको माओवादीसँग किन एकता गर्नुपर्यो ? भनेका छन्, हामीलाई परिवर्तनकारी शक्ति तिमीहरु हौ किन एमालेसँग एकता गर्नुपर्यो ? भनेका छन् । हामी पनि ०६४ मा ठूलो पार्टी थियौं । जनताले पछारेपछि सानो हुँदा कस्तो हुन्छ हामीलाई थाहा छ ।”
प्रचण्डको मन्तव्यपश्चात् एमालेका अध्यक्ष ओलीले मञ्चबाटै प्रचण्डलाई कटाक्ष गरे । काठमाडौँको सभागृहमा आयोजित कार्यक्रममा प्रचण्डलाई एकता ‘फगत भावनात्मक’ कुरा नभएको भन्दै कटाक्ष गरेका हुन् ।
उनले भने, “मभन्दा अगाडि बोल्नुभएका प्रचण्डजीले म र केपीजी नमिले पनि एकता हुन्छ भनेर भावनात्मक कुरा गर्नुभयो । एकता त्यस्तो सेन्टिमेन्टल कुरा होइन । हामीले एकता प्रक्रिया सुरु गरेपछि निष्कर्षमा पनि हामीले नै पु¥याउँछौँ ।”
उनले पनि व्यंग्य कस्दै भने, “एकता प्रक्रिया सुपरमार्केटमा राम्रो लागेर खरिद गरेजस्तो सामग्री होइन । बाटामा फेला पारेको अमुक बस्तु पनि होइन । एकताका लागि नीतिगत, वैचारिक आधार तयार भइसकेकाले अब कुनै हालतमा रोकिनुहुन्न र रोक्ने ठाउँ र तर्क पनि सकिएको छ ।”
उनले एकता असमानता, विभेद र अन्यायपूर्वक नहुने र समावेशी र समानुपातिक सिद्धान्त नै अवलम्बन गरिने जिकिरसमेत गरे ।
व्यानर हटाइएको घटनाको सन्दर्भमा उनले ‘दाँतमा ढुंगा लागेको’ बताए । उनले भने, “एकताअगाडि यस्ता घटना हुन्छन् । बिहे गर्नुअगाडि पनि दुईवटा घर हुन्छन्, बिहेपछि त्यो घरको बाछो र बिरालो पनि माया लाग्छ । आजको घटना पनि त्यस्तै हो ।”
एकताका बारेमा आश्वस्त पार्न दुवै अध्यक्षले एउटै मञ्चबाट सम्बोधन गर्ने कार्यक्रम आयोजना गरे पनि प्रधानमन्त्री ओली कांग्रेसको आलोचना गर्नमै बढी शब्द खर्चिएका थिए ।
उनले कांग्रेसका एक अमुक नेताले प्रधानमन्त्री अधिनायकवादी बन्दै गएको भन्ने टिप्पणीप्रति प्रतिपक्षलाई प्रतिक्रियावादीको संज्ञा दिए । कांग्रेस दरबारको पाउ समातेर कम्युनिष्ट सिध्याउन लागिपरेको टिप्पणी गरे । (तस्बिर : रासस)
प्रतिक्रिया