काठमाडौँ । सरकारले नेपाल प्रहरीको महानिरीक्षक (आईजीपी)मा सर्वेन्द्र खनाललाई नियुक्त गरेको छ ।
प्रधानमन्त्रीको निवास बालुवाटारमा मंगलबार बसेको मन्त्रिपरिषद्को बैठकले मन्त्रिपरिषद्को बैठकले डिआईजी खनाललाई आईजीपीमा नियुक्त गरेको हो ।
यस्तै सशस्त्र प्रहरी बल नेपालको महानिरीक्षकमा शैलेन्द्र खनाललाई बढुवा नियुक्ति गरेको छ ।
उनीहरुलाई उक्त पदमा नियुक्त गर्ने निर्णय गरेको सञ्चार तथा सूचना प्रविधि राज्यमन्त्री गोकुलप्रसाद बाँस्कोटाले जानकारी दिए । राज्यमन्त्री बाँस्कोटाका अनुसार उनीहरुलाई चैत २९ गते बिहीबारदेखि लागू हुने गरी जिम्मेवारी दिइएको हो ।
संगठनमा प्रहरी नायब महानिरीक्षकको वरियतामा दुवै जना शीर्षस्थानमा रहेका थिए । नेपाल प्रहरीका महानिरीक्षक प्रकाश अर्याल र सशस्त्रका महानिरीक्षक सिंहबहादुर श्रेष्ठ तीस वर्षे अवधिका कारण बुधबारदेखि अवकाशमा जाँदैछन् ।
खनाल २०४६ माघमा प्रहरी निरीक्षकमा भर्ना भएका थिए । आफ्नो ब्याचका साथीहरुमा एसएसपीबाट डिआईजीमा बढुवा हुँदा खनाल एक नम्बरमा बढुवा भएका हुन् ।
‘सेलिब्रेटी अफिसर’को रुपमा चिनिएका खनाल २०७२ मा महानगरीय अपराध महाशाखाको प्रमुख रहेर काम गरेका थिए । अपराध महाशाखाको प्रमुख हुँदा २०७२ भदौ ३ गते उनले गुण्डा नाईके कुमार ‘घैंटे’को इन्काउन्टर गरेर थप चर्चा बटुलेका थिए ।
मन्त्रिपरिषद्को बैठकले सशस्त्र प्रहरी प्रमुखमा शैलेन्द्र खनाललाई नियुक्त गरेको छ । सशस्त्रको आईजीपीका लागि खनालसँगै पुष्पराम केसी पनि आकांक्षी थिए । सशस्त्र प्रहरीका महानिरीक्षक सिंहबहादुर श्रेष्ठको पनि तीसवर्षे सेवा अवधिका कारण बुधबारदेखि अवकाश पाउँदैछन् ।
प्रतिक्रिया