.jpg?fit=%2C&ssl=1)
हिमालयखवर संवाददाता
अमेरिका-
अमेरिकाको श्रम विभाग (डिपार्टमेण्ट अफ लेबर) को तथ्यांक अनुसार अमेरिकामा रोजगारी गर्ने मध्ये करिब १७ प्रतिशत आप्रावासी छन् । यसरी रोजगारी पाउने आप्रावासीको संख्या झण्डै साढे २ करोड रहेको विभागले जनाएको छ ।
विभागका अनुसार निमार्ण, विक्री वितरण(सेल्स), मर्मत सम्भार, व्यवस्थापन, प्रशासन सहायक, उत्पादन, यातायात , खानासँग सम्बद्ध सेवा व्यवसाय र स्वास्थ्य क्षेत्रमा आप्रावासीको संख्या ५ प्रतिशत भन्दा बढी छ ।
कानुनी सेवा, सामुदायिक तथा समाजिक सेवा, वैज्ञानिक, तत्काल आपतकालिन सेवा जस्ता क्षेत्रमा रोजगार पाउनेमा विदेशमा जन्मेका आप्रावासीको प्रतिशत कम छ ।
निमार्ण व्यवसाय क्षेत्रमा कुल रोजगारी मध्ये ९ प्रतिशत विदेशमा जन्मेका आप्रावासीले ओगटेका छन् । यसमा निमार्ण लगायत इलेक्ट्रिशियन, छाना बनाउने, काठको काम गर्ने समेत पर्छन । विक्री वितरणमा उपलब्ध रोजगार मध्ये ८ दशमलव ६ प्रतिशत विदेशमा जन्मेका आप्रावासी छन् । जसमा क्यासियर, ट्राभल एजेण्ट, टेलिमार्केटर लगायत पर्छन ।
मर्मत संभारमा कार्यरत मध्ये विदेशमा जन्मेका कामदार ८ दशमलव ४ प्रतिशत छन् । यसमा घरासयी सेवा लगायत ल्याण्डस्केपसम्मका कामहरू पर्छन ।
व्यवस्थापक अर्थात् म्यानेजर मध्ये ८ दशमलव १ प्रतिशत विदेशमा जन्मेका आप्रावासी छन् । जसमा कम्पनीका प्रमुख कार्यकारी, विक्री प्रबन्धक लगायत पर्छन । ठुला कम्पनी गुगल, माइक्रोसफ्ट जस्ता कम्पनीका म्यानेजर पनि आप्रावासी हुन् ।
प्रशासन सहयोगीका रूपमा काम गर्ने मध्ये आप्रावासीको संख्या ८ प्रतिशत छ । यसमा बैंक टेलर, हुलाक सेवा, रिसेप्सनिष्ट, बुककिपर जस्ता कर्मचारी पर्छन । स्वास्थ्य क्षेत्रमा रोजगार हुने मध्ये विदेशमा जन्मेका आप्रावासीको संख्या जम्मा ५ दशमलव २ प्रतिशत छ । यसमा डाक्टर, डेन्टिस्ट लगायत अन्य स्वास्थ्यकर्मी पर्छन् ।
वैज्ञानिक मध्ये आप्रावासीको संख्या जम्मा १ दशमलव २ प्रतिशत मात्र छ । यसमा भौतिकशास्त्री, रसायनशास्त्री, अर्थशास्त्री जस्ता पेशा पर्छन । समुदाय तथा समाजिक सेवा, कानुन क्षेत्रमा कुल रोजगार मध्ये विदेशमा जन्मेका आप्रावासीको संख्या १ प्रतिशत भन्दा कम छ । कानुनी सेवामा रोजगार पाउने मध्ये जम्मा शून्य दशमलव ४ प्रतिशतमात्र विदेशमा जन्मेका आप्रावासी छन् । तस्बिर: सामाजिक संजाल
प्रतिक्रिया