चैत २०, काठमाडौं । राष्ट्रिय ध्वजावाहक नेपाल वायु सेवा निगमले आगामी डेढ वर्षभित्र आठओटा नयाँ विमान खरीद गर्ने भएको छ । निगमले सेवा सुधार्ने कार्ययोजनाबारे मङ्गलवार पत्रकार सम्मेलन गरी जानकारी दिँदै अन्तरराष्ट्रिय र आन्तरिक सेवा दुवैतर्फ विमान थप्दै निगमको कुल आय बढाउँदै लैजाने बताएको हो ।

 

निगमका महाप्रबन्धक सुगतरत्न कंसाकारले आगामी १८ महीनाभित्र आन्तरिक उडानका लागि छ भाइकिङ ट्विनअटर र अन्तरराष्ट्रिय उडान गर्न दुई एयरबस न्यारोबडी (ए३२०–२००) विमान खरीद गरिने जानकारी दिए । नयाँ विमान थप्ने कार्यसँगै निगमसँग भएका सबै पुराना विमान आउँदो १८ महीनाभित्र प्रतिस्थापन गरिनेछ । हवाई सुरक्षालाई उच्च प्राथमिकता दिएर जुनसुकै मूल्य चुकाएर भए पनि सुरक्षाको मामलामा अन्तरराष्ट्रियस्तरमा नै पु¥याउने कार्य प्रारम्भ गरिने महाप्रबन्धक कंसाकारको भनाइ छ ।

 

निगमका अनुसार आउने असारभित्र दुईओटा ‘वाइडबडी’ विमान ल्याएर लामो उडान रुटमा उडान गर्ने योजनामा रहेको राष्ट्रिय ध्वजावाहकले थप दुई ‘न्यारोबडी’ एयरबस जहाजबाट क्षेत्रीय उडान विस्तार गरिनेछ । पछिल्लो सयम सन् २०१५ मा निगमले अन्तरराष्ट्रिय उडानका लागि एयरबस ए ३२०–२०० सिरिजका दुई विमान खरीद गरेको थियो । विमान थपेर गन्तव्य विस्तार गर्दै निगमलाई बढी नाफा कमाउनेतिर लैजाने योजना अघि सारेको छ ।

 

निगमलाई सुधार्न विमान थप्नुको विकल्प नरहेको भन्दै गन्तव्य विस्तार र बजारीकरणलाई तीव्रता दिइने महाप्रबन्धक कंसाकारले बताए । नयाँ वाइडबढी विमान आएपछि वार्षिक कम्तीमा पाँच अर्बको व्यापार बढ्ने निगमको दाबी छ । सन् २०१७ मा निमगले रू.सात करोड ५० लाख नाफा कमाएको बताएको छ । जहाज थप गरेपछि व्यवस्थापन र सुरक्षामा केन्द्रित हुने र त्यसका लागि विज्ञ परामर्शदाता नियुक्त गरिसकिएको निगमको भनाई छ । जहाज थपिएपछि बाहिरबाट जनशक्ति व्यवस्थापन गर्ने र हवाई सुरक्षाका लागि संसारकै नयाँ प्रविधि जडान गर्ने रणनीति निगमको योजनामा रहेको छ ।

 

निगमसँग हाल दुई एयरबस ए ३२०–२०० सिरिजका, एक बोइङ ७५७ विमान छन् । यी विमानले विभिन्न आठ गन्तव्यमा अन्तरराष्ट्रिय उडान भर्दै आएका छन् । आन्तरिकतर्फ नौओटा विमान छन् । यीमध्ये चीनबाट ल्याइएका वाइ १२ चारओटा, एमए १६, २ ओटा र ३ ट्विनअटर विमान छन् ।