मेरील्याण्ड (अमेरिका)– अमेरिकाको पूर्बीउत्तर राज्य मेरिल्याण्डको एक हाइस्कूलमा भएको गोलीकाण्डमा तीन घाइते भएका छन् ।
सिएनएनले जनाए अनुसार सेन्ट मेरिज काउन्टीको ग्रेट मिल्स हाइस्कूलमा मंगलबार बिहान गोली प्रहारको घटना भएको हो । प्रहरीले घटनाको बारे अनुसन्धान गरिरहेको छ ।
घटनामा तीनजना घाइते भएको स्कुलका एक अधिकारीले सिएनएनलाइ बताएका छन् । अहिले स्कुललाइ पुरै सिल्ड गरेर अनुसन्धान सुरू गरिएको छ ।
गोली कसले र कुन उद्देश्यले हानेको थियो भन्ने छानबीन भैरहेको छ । स्कूलमा गोली प्रहारको घटनापछि स्कूल बन्द गरिएको छ र प्रहरीले विद्यार्थीका अभिभावकहरुलाई विद्यालय वरपर नजान अनुरोध गरेको छ ।
गोली काण्ड घटेको यो स्कूल राजधानी वासिंगटन डिसीबाट दक्षिण तर्फ रहेको छ । विद्यालयमा बन्दुक नियन्त्रण कानुन सम्बन्धी अमेरिकामा बहस जारी रहेका बेला निरन्तर रुपमा यसरी विद्यालयभित्र गोलीकाण्डका घटना भैरहेका छन् ।
यस वर्षमात्र अमेरिकाका विभिन्न राज्यका विद्यालयहरुमा १६ वटा गोलीकाण्डका घटना भैसकेको सीएनएनले उल्लेख गरेको छ । सिएनएनका अनुसार यो वर्षको ११ हप्ताको बीचमा करीब एक साताको अन्तरमा विद्यालयमा गोलीकाण्ड मच्चिएको छ । गत फेब्रुअरी १४ तारिख फ्लोरिडाको पार्कल्याण्डस्थित एक हाइस्कूलमा भएको गोलीकाण्डको घटनामा १७ जना किशोर विद्यार्थी मारिएका थिए ।
प्रतिक्रिया