हिमालयखवर संवाददाता
अमेरिका- यस वर्षको ओस्कारमा द सेप अफ द वाटरले बाजी मारेको छ । अमेरिकाको लसएञ्जल्स स्थित डाब्ली थिएटरमा आइतबार आयोजना गरिएको ९० औँ ओस्कार पुरष्कार वितरण समारोहमा उत्कृष्ट फिल्म (वेष्ट पिक्चर) सहित सेप अफ द वाटरले ४ वटा ओस्कार आफ्नो बनाएको हो ।
ओस्कार विश्वकै सबैभन्दा प्रभावशाली र ठुलो फिल्मी दुनियाँ हलिउडको प्रतिष्ठित पुरष्कार हो ।
यस वर्ष द सेप अफ द वाटर १३ अलग अलग विद्यामा ओस्कारका लागि मनोनयनमा परेको थियो । यस मध्ये द सेप अफ द वाटरले चार विद्याका पुरष्कार आफ्नो पोल्टामा पारेको हो ।
उक्त फिल्मका निर्देशक गीयेरमो डेल टोरोले उत्कृष्ट निर्देशकका रूपमा ओस्कार विजेता भएका छन् ।
उत्कृष्ट अभिनेता विद्यामा डार्केष्ट आवर फिल्मबाट गैरी ओल्डम्यानले ओस्कारवाट पुरष्कृत भए । उत्कृष्ट अभिनयका लागि अभिनेत्री फ्रांसेस मकडोर्मडले ओस्कार हात पारिन ।
फेसन, मनोरञ्जन सहितको भव्य उक्त ९० औँ ओस्कार वितरण समारोहमा महिला माथि हुने ज्यादती, अमेरिकामा आप्रावासीको योगदान जस्ता विषयपनि प्रवेश गरेका थिए । एक वर्ष यता विश्वले गुमाएर चलचित्र उद्योगमा संलग्नहरूलाई पनि उक्त अवसरमा श्रद्धान्जली दिइएको थियो । यसमा भारतीय फिल्म उद्योगले गुमाएका श्रीदेवी, शशी कपुरको पनि समावेश थिए ।
सन् २०१७ बनेको द सेप अफ द वाटर एउटी गुप्त सरकारी प्रयोगशाला सफाइ गर्ने महिला कर्मचारीले विशेष जनावर भेटेपछिको कथा हो । करिब २ करोड डलरको लगानीमा बनेको यो फिल्मले झण्डै साढे ११ करोड कमाएको थियो ।
प्रतिक्रिया