हिमालयखवर संवाददाता
अमेरिका – जम्मा सात दिनमा अमेरिकाको मुख्य शेयर बजार सूचक एक हजार अंकले माथि चढ्यो । एक सय वर्ष भन्दा न्यूयोर्क स्टक एक्स्चेञ्ज परिसुचक जसलाई डोजोन्स भनिन्छ यो २५००० अंकवाट सात दिनमा लामो छुट्टी पछि मंगलवार कारोबार सुरु हुदां २६००० अंक छोएको हो । यसको अर्थ कम्पनीका शेयर किन्नेको सम्पत्ति बढ्यो भन्ने हो ।
शेयर बजारलाई अर्थतन्त्रको ब्यारोमिटर भनिन्न । यसलाई आधार मान्ने हो भने राष्ट्रपति डोनाल्ड ट्रम्पले सत्ता लिए यताको कार्यकाल सफल भन्न सकिन्छ । ट्रम्पलाई लिएर इमिग्रेशन, मिडियामा प्रत्येक दिन जस्तो आइरहने विवादलाई छाड्ने हो भने राष्ट्रपति ट्रम्पको अहिलेसम्मको कार्यकाल सफल छ भन्न सकिन्छ ।
ट्रम्प राष्ट्रपति भएपछि यता डोजोन्स ८००० अंकले माथि चढेको छ । यो झण्डै ४२ प्रतिशतको वृद्धि हो । कर्पोरेटहरुको नाफा वृद्धि, अमेरिकाको मजबुत आर्थिक वृद्धि, कर नीतिमा गरिएको सुधारले शेयर बजारमा निकै उत्साह आएको हो । यो शेयर बजारलाई रेल मान्ने हो भने ट्रम्प आएकापछि यो द्रुत गतिका अगाडी बढिरहेको छ ।
सन् २०१७ को अन्तिम साता ट्रम्पले नयाँ कर सुधार नीतिमा हस्ताक्षर गरेका थिए । यसलाई अमेरिकाको इतिहासमा ३० वर्ष यताकै सबैभन्दा ठुलो कर नीतिमा सुधार भनिएको छ । यसले ठुला संस्थानहरुको नाफा वढाउंन मद्दत गर्छ । यसै वर्ष देखि लागु भएको यो कर नीतिबाट कर्पोरेटको नाफा बढ्ने हुदां कतिपयले कर्मचारीलाई बोनस पनि दिने घोषणा गरेका छन् । सबैभन्दा ठुलो रोजगारी दिने वालमार्टले प्रत्येक कर्मचारीले १ हजार डलर बोनस दिने जनाएको छ । एटीएण्डटी लगायत अन्य कम्पनीले पनि यस्तै घोषणा गरेका छन् ।
अमेरिकाको शेयर बजारमा बिस्तारै नेपालीले पनि लगानी गर्दै छन् । सानो सङ्ख्यामा भए पनि शेयर बजारमा लगानी गर्ने नेपाली भेटिन्छन् । धेरैको चासो बढ्दै छ । तर, बजारमा उछाल आएको वेला लगानी गर्दा मर्कामा पनि पर्न सकिन्छ । शेयर बजारमा हात हाल्दा केही विश्लेषण गरेर निर्णय लिदां जोखिम पनि कम गर्न सकिन्छ ।
प्रतिक्रिया