एनआरएन विशेष

एनआरएनको प्रत्यक्ष बैठक ह्युस्टनमा सुरु

397 पटक पढिएको

किन सहभागी भएनन् गौरी जोशी ?

6th Jan 2018, Saturday | २०७४ पुष २२, शनिबार १३:०१
हिमालय खबर संबाददाता
ह्युस्टन (अमेरिका) - गैर आवासीय नेपाली संघ (एनआरएन) अमेरिकाको नयाँ कार्यसमितिको तेस्रो प्रत्यक्ष बैठक अमेरिकाको चौथो ठूलो शहर ह्युस्टनमा सुरु भएको छ । 
 
चार महिना अघि डा. केशव पौडेलको नेतृत्वमा निर्वाचित कार्यसमितिको बैठक ह्युस्टनको कन्फर्ट इनमा भरखरै सुरु भएको छ । डा. पौडेलको अध्यक्षतामा सुरु भएको तेस्रो प्रत्यक्ष बैठकमा सहभागी हुन अमेरिकाको पूर्बी तटीय कनेक्टिकटदेखि पश्चिममा लसएन्जसलबाट एनआरएन अमेरिकाका पदाधिकारीहरु आएका छन् । 
 
सामान्यतया टेलिकन्फरेन्स बैठक हुने गरेकोमा यसपटक ह्युस्टनमा प्रत्यक्ष बैठक राखिएको हो । 
 
बैठकस्थलमा रहेका हिमालय खबर सहकर्मीका अनुसार भरखरै सुरु भएको बैठकमा वरिष्ठ उपाध्यक्ष सुनिल शाहले सहभागीहरुलाई स्वागत गरेका छन् । बैठकका एजेण्डाहरु धेरै भएकोले झण्डै चारघण्टासम्म बैठक चल्ने अनुमान गरिएको छ । 
 
एनआरएन हेल्प डेस्क, परिचय–पत्र, स्कूल, विद्यार्थीहरुलाई दिने छात्रवृत्ति लगायत यसपटक महत्वपूर्ण एजेण्डाहरु छन् । एनआरएन अमेरिकामा १६ हजार सदस्य रहेकोमा करिब साढे चारसयले मात्र एनआरएन परिचयपत्रका लागि चासो दिएका छन् । 
 
सहभागी भएनन् गौरीः
यसैबीच दुई महिना अघि काठमाडौंमा भएको एनआरएनको अन्तर्राष्ट्रिय समनवय परिषदको सम्मेलनबाट निर्वाचित एनआरएन अमेरिकाजका क्षेत्रीय संयोजक गौरीराज जोशी भने बैठकमा सहभागी भएका छैनन् । 
 
एनआरएन एनसीसीको बैठकमा क्षेत्रीय संयोजकलाई आमन्त्रण गर्नुपर्ने प्रावधान छ । बैठकमा क्षेत्रीय उपसंयोजक नविन शेरचन, आइसीसी मेम्बर बेदराज बस्नेत भने सहभागी छन् । आइसीसी मेम्बरहरु मध्य बस्नेतमात्र सहभागी छन् । 
 
क्षेत्रीय संयोजक जोशी, एनआरएन अन्तर्राष्ट्रिय समितिका सल्लाहकार हरिबोल भण्डारी लगायत महत्वपूर्ण व्यक्तिहरुले उपस्थित छैनन् । जोशीले पारिवारिक कारणले सहभागी नभएको बताए । 
 
जोशी, भण्डारी लगायत एनआरएन अमेरिकाका महत्वपूर्ण व्यक्तिहरुको अनुपस्थितीले संस्थाभित्र केही विषयमा मतान्तर बढ्दै गएको संकेत गरेको छ ।