देश

सौराहामा ड्रेसमा आउने विद्यार्थीलाई कोठामा बस्न कडाई

612 पटक पढिएको

हिमालय खबर संवाददाता | 21st Nov 2017, Tuesday | २०७४ मंसिर ५, मंगलवार ०१:४२
सौराहा, चितवन– चितवनको पर्यटकीय नगरी सौराहाको पर्यटन क्षेत्रलाई व्यवस्थित गरी पर्यटनमैत्री बनाउन यहाँका व्यवसायीले आचारसंहिता जारी गरेका छन् । 
 
ध्वनि प्रदूषणमा नियन्त्रण, पर्यटनमैत्री वातावरण, वन, वन्यजन्तु र वातावरण संरक्षणलाई केन्द्रमा राखेर व्यवसायीले १६ बुँदे आचारसंहिता जारी गरेका हुन् ।
 
क्षेत्रीय होटल संघ, क्षेत्रीय रेवान, प्रहरी, नेचर गाईड एशोसिएशन, बाघमारा वन, हात्ती सहकारी र साना पर्यटन व्यवसायी समूहको संयुक्त भेलाले सो निर्णय गरेको संघका अध्यक्ष सुमन घिमिरेले जानकारी दिए ।
 
संयुक्तरुपमा जारी गरिएको विज्ञप्तिमा कुनै मेला महोत्सवबाहेक जाडो समयमा राति ११ बजेसम्म र गर्मी समयमा १२ बजेसम्म होटल रेष्टुराँ सञ्चालन गर्ने उल्लेख छ । 
 
 
पर्यटकलाई बीच बाटोमा रोकेर हात्ती, जिप सफारी तथा होटलको कोठा बेच्न नपाउने, पर्यटन क्षेत्रका बाटोघाटोमा गाडी रोक्न नपाउने, कलेज / स्कुल ड्रेसमा आएका विद्यार्थीका लागि जिम्मेवार अभिभावक नभएसम्म कोठामा बस्न नदिने, स्वीमिङ पुलमा अनिवार्यरुपमा लाइफ ज्याकेट राख्ने, अनुमतिबिना ड्रोनको प्रयोग गर्न नदिनेजस्ता आचारसंहिता बनाइएको छ ।
 
आगामी पुस १ गतेदेखि भने सौराहालाई हर्न निषेध क्षेत्र घोषणा गरिने तयारीसमेत गरिएको क्षेत्रीय रेवान सौराहाका अध्यक्ष गोकर्ण गिरीले जानकारी दिए ।
 
सौराहामा हाल ११० सुविधायुक्त होटल छन् भने झण्डै ६० वटा रेष्टुराँ रहेका छन् । यहाँ दैनिक दुई हजार ८०० पर्यटक बस्न सक्ने क्षमता रहेको छ । 
 
विगत केही वर्षदेखि कलेज/स्कुलबाट ड्रेसमै युवायुवती घुम्न आउने र सौराहाका होटल/लजहरुमा सहजै प्रवेश दिने गुनासा सुनिँदै आएका थिए । सौराहामा अन्य ठाउँभन्दा सुरक्षित ठानिएका कारण यौनजोडीको रोजाइ रहँदै आएको थियो ।
 
आचारसंहिता लागू भएपछि सौराहाको प्रतिष्ठा नै बिगार्ने यस्ता क्रियाकलापमा कमी आउने एक व्यवसायीले बताए । ‘विशुद्ध मनोरञ्जन प्रदान गर्ने स्थलका रुपमा सौराहाको पहिचान बन्नुपर्छ, न कि यौनयोडीको मनोरञ्जनको स्थल’ उनले भने ।