बिजनेस

घुमघामको प्रमुख गन्तव्य बन्दै शाश्वतधाम

620 पटक पढिएको

हिमालय खबर संवाददाता | 21st Nov 2017, Tuesday | २०७४ मंसिर ५, मंगलवार ०७:१९
नवलपरासी– नवलपरासीको रजहरस्थित शाश्वतधाम सञ्चालनमा आएको छोटो समयमै लाखौं नेपाली घुम्न पुगेका छन् । 
 
 फागुनमा औपचारिक उद्घाटनपछि सर्वसाधारणका लागि खुला भएको धाममा अहिलेसम्म ७ लाख २५ हजारजना घुम्न आएको जानकारी धाम सम्वद्ध अधिकारीहरुले दिएका छन् । 
 
घुम्न आउनेमा प्रायः नेपाली नै छन् । व्यावसायिक संस्था चौधरी ग्रुपको सामाजिक एवम् मानवीय कल्याणकारी निकाय चौधरी फाउण्डेशनले देवचुली नगरपालिका वडा नं २ मा रहेको दुम्कौलीमा शाश्वतधाम निर्माण गरेको हो । 
 
सीजी इन्डष्ट्रियल पार्क परिसरभित्र करिब सात बिघा जमिनमा शाश्वतधाम निर्माण भएको छ । मन्दिर त नौलो र आकर्षक छ नै पृष्ठभूमिमा रहेका नवलपरासी जिल्लाका अग्ला पहाडहरु देवचुली र वरचुलीले झनै सुन्दरता थपेका छन् । 
 
 
पूर्वपश्चिम राजमार्गसँग जोडिएको सो ठाउँ चितवन नारायणगढदेखि लगभग २२ किलोमिटर पश्चिममा छ । गाडीमा हिँडेका बेलामा पनि सजिलै देखिने धामले धेरैलाई लोभ्याएको छ । ‘उद्घाटन भएपछि अहिलेसम्म सवा लाखजनाले धाम घुमेका छन्’ धामका कार्यकारी प्रमुख अधिकृत नारायण श्रेष्ठले भने । नयाँ वर्षको दिन वैशाख १ गते एकै दिन ३० हजारजना आएको उनले बताए ।
 
‘दसैँका बेलामा लगातार जसो दिनमा १०÷१० हजारले धाम अवलोकन गरेका छन्’ कार्यकारी प्रमुख अधिकृत श्रेष्ठले भने । धाम घुम्न कुनै शुल्क लाग्दैन । धामभित्र धार्मिक सङ्ग्रहालय छ । सो सङ्ग्रहालय घुम्न सय रुपैयाँको टिकट लाग्छ । विद्यार्थीले २५ रुपैयाँ तिरे पुग्छ । आठ वर्षभन्दा कम उमेरका बच्चाहरुलाई सङ्ग्रहालय घुम्दा पनि शुल्क नलाग्ने श्रेष्ठले बताए । 
 
‘यो धाम सनातन धर्म र अध्यात्मको संगम हो । सबै उमेर समूहकाले घुम्न रुचि देखाएका छन्’ चौधरी ग्रुपका प्रमुख रहेका उद्योगपति विनोद चौधरीले भने । हिन्दूधर्मका साथै बौद्ध धर्मका विषयहरुलाई पनि धामभित्र राख्न लागेको चौधरीले जानकारी दिए । अवलोकन गर्न आउनेको संख्याले यो ठाउँ नेपालकै प्रमुख धार्मिकस्थल हुने सम्भावना बढेर गएको उनले बताए ।
 
शंकराचार्य जयेन्द्र सरस्वतीले चौधरी ग्रुपका संस्थापक स्वर्गीय लुनकरण चौधरीलाई दिएको सल्लाह अनुरुप लुनकरणका छोरा विनोद चौधरीले सो धाम निर्माण गरेका हुन् । धामको मध्य भागमा विश्वमै प्रसिद्धि कमाएको खजुरावान शैलीमा बनेको बुट्टेदार एकम्बरेश्वर शिव मन्दिर रहेको छ । 
 
मन्दिरलाई चारैतिरबाट सर्वतीर्थ सरोवर तालले घेरेको छ, जहाँ बद्री, केदार, हरिद्वार, मुक्तिनाथ, र पशुपतिनाथजस्ता प्रसिद्ध धार्मिक तीर्थस्थलबाट ल्याइएको जल मिसाइएको छ । धामभित्र गुरूकुल विद्याश्रम, अखण्ड अग्निकुण्ड, शक्तिघाट, धर्मशाला, यज्ञकुण्ड, हनुमानमन्दिर, धार्मिक प्रदर्शनी, धार्मिक सङ्ग्रहालय, डिजिटल धार्मिक पुस्तकालय, हेरिटेज बिल्डिङ र हल छन् ।