हिमालयखबर संवाददाता-
काठमाडौं – गैरआवासीय नेपाली संघ (एनआरएनए)को आठौँ विश्व सम्मेलनमा यतिबेला धमाधम मतदान चलिरहेको छ । सम्मेलनमा एक हजार ८५४ जना मतदाता रहेका छन् । सोमबार राति १० बजेसम्म मतदान सकिने विश्वास निर्वाचन समितिले लिएको छ ।
एनआरएनको अध्यक्षमा वर्तमान उपाध्यक्ष भवन भट्ट र वर्तमान अध्यक्ष शेष घलेकी श्रीमती जमुना गुरुङबीच तीव्र प्रतिस्पर्धा छ । गुरुङ र भट्ट समूहबीच आइतबार रातभरदेखि सोमबार मध्यान्हसम्म सहमतिका लागि प्रयास भए पनि टुंगोमा पुग्न नसकेपछि निर्वाचन समितिले चुनाव नै गनर्ने निर्णय गरेको थियो ।
भट्ट जापान र गुरुङ अस्ट्रेलियाबाट एनआरएनमा प्रतिनिधित्व गरेका हुन् । अध्यक्षका दाबेदार रहेका टिबी कार्कीको नाम पनि अध्यक्षमा चर्चामा रहे पनि उनले उम्मेदवारी नै दर्ता गराएनन् ।
उपाध्यक्षमा खगेन्द्र क्षेत्री, कुमार पन्त, कुल आचार्य, सोनाम लामा, चिरिञ्जीवी थापा, रविना थापाबीच प्रतिस्पर्धा छ । यस्तै, महिला उपाध्यक्षमा रञ्जु थापा र सपिला राजभण्डारीबीच प्रतिस्पर्धा छ ।
महासचिवमा अर्जुनकुमार श्रेष्ठ, बद्री केसी, यमकुमार गुरुङ त्रिलोक चुनावी मैदानमा भिडेका छन् । सचिवमा डिबी क्षेत्री, देवीबहादुर बस्नेत, गणेश केसी, ऋषिराम कँडेल, सन्तोषकुमार भट्टराईमध्ये कसले बाजी मार्लान् भनेर अड्कल काट्न गाह्रो छ ।
यस्तै, कोषाध्यक्षमा हिक्मत थापा र मुक्षेत्र गुरुङबीच प्रतिस्पर्धा छ भने सहकोषध्यक्षमा चक्रबहादुर थापा र सोमनाथ सापकोटा मैदानमा भिडेका छन् । विद्युतीय मतदान गरिएकाले मतपरिणाम सोमबार राति नै सार्वजनिक हुने सम्भावना छ । अहिलेसम्म करिब एकतिहाईले मतदान गरेको अनुमान गरिएको छ ।
एनआरएनएको सन् २०१७ देखि ०१९सम्म कार्यकालका लागि अध्यक्ष, दुई उपाध्यक्ष, एक जना महासचिव, एक सचिव र एक कोषाध्यक्ष निर्वाचित हुनेछन् ।
यस्तै युरोप, अमेरिका, अफ्रिका, एशिया, ओसेनिया र मध्यपूर्वका एक–एकजना गरी छ क्षेत्रीय संयोजक र छ उपसंयोजक तथा महिला संयोजक र उपसंयोजक एक–एकजना तथा युवा संयोजक र उपसंयोजक एक–एकजना निर्वाचित हुनेछन् ।
प्रतिक्रिया