समाज / राजनीति

बाबुले युवतीको शव देखेपछि पक्राउ परे छोरा

2543 पटक पढिएको

केशव भट्टराई / हिमालय खबर

16th Sep 2017, Saturday | २०७४ भाद्र ३१, शनिबार ०७:२४
नारायणगढ– भरतपुर महानगरपालिका वडा नं २१ पहारिलोटारकी २० वर्षीया सुजता बराल घिमिरेको हत्यामा बोराभित्र पोको पारेर फालेको अवस्थामा शव भेटिएकोे प्रहरीले जनाएको छ । 
 
हत्यामा संलग्न प्रमुख अभियुक्त भरतपुर २३ बस्ने १७ वर्षीय तिलक नेपालीलाई उनको घरबाटै भदौ २७ गते पक्राउ गरिएको प्रहरीले जनाएको छ । 
 
अभियुक्त नेपालीले हत्या गरेको स्वीकारिसकेको प्रमुख थापा बताए । सोही घटनामा अन्यको पनि संलग्नता रहेकाले खोजी कार्य भइरहेको प्रहरीले बुधबार पत्रकार सम्मेलन गरी जानकारी दिएको छ । 
 
हत्या गरी फालिएकी युवतीको शव हत्या आरोप लागेका तिलकका बुवा तुले भनिने दिलबहादुर नेपालीले घाँस काट्न जाँदा देखेपछि प्रहरीलाई खबर गरेका थिए । 
स्थानीय प्रकाश बरालका अनुसार हत्या आरोप लागेका तिलकका बाबुले नै उक्त शव देखेपछि सबैलाई खबर गरेका थिए । आफूले देखेको शव छोराले नै हत्या गरेको भन्ने प्रारम्भिक जानकारी पाएपछि दिलबहादुर स्वयं आश्चर्यमा परेका छन् । 
 
भदौ २२ गते भरतपुर २३ स्थित शितलपानीमा स्थानीय दिनानाथ पौडेलेको खेतको कुलोमा बोरामा पोको पारेर फालिएको अवस्थामा शव भेटिएको थियो । भदौ १७ गते बेलुकी घरबाट हराएकी युवतीको शव २२ गतेमात्र फेला परेको थियो । 
 
घटना रहस्यमय भएपछि यस घटनामा जिल्ला प्रहरी कार्यालय चितवनको मुद्दा फाँटमा कार्यरत प्रहरी निरीक्षक अन्जना श्रेष्ठलाई अनुसन्धानमा खटाएको थियो । एक हप्तापछि घटनाबारे तथ्यहरु खुलेको प्रहरी प्रमुख थापाले बताए । 
 
बोराभित्र हालिएको अवस्थामा शंकास्पद रुपमा शव फेला परेपछि परिवार र छिमेकीले हत्यारा पत्ता लगाउनका लागि प्रहरी प्रशासनलाई निरन्तर दबाब दिएका थिए । युवतीको माइतीघर पनि भरतपुर २३ मा रहेको प्रहरीको भनाइ छ । 
 
मृतकको श्रीमान् विदेशमा रहेको प्रहरीले जनाएको छ । शव फेला परेपछि भएको पोष्टमार्टमका आधारमा युवतीको हत्या भएको भन्ने पुष्टि भएको प्रहरी प्रमुख थापाले बताए । अभियुक्तविरुद्ध कर्तव्य ज्यान मुद्दा चलेको र बुधबार नै अदालतबाट म्याद थप गरी अनुसन्धान भइरहेको प्रहरीले जनाएको छ ।