लन्डन । गैर आवासीय नेपाली संघ (एनआरएन) अमेरिकाको निर्वाचनमा गौरीराज जोशी उम्मेदवार बन्न योग्य भएको ठहर विशेष समितिले गरेको छ । गैरआवासीय नेपाली संघको गत आइतवार जर्मनीको फ्रयाङफर्डमा सम्पन्न बैठकले गठन गरेको विशेष समितिले जोशी एनआरएन अमेरिकाको उम्मेदवार बन्न योग्य रहेको निष्कर्ष निकालेको हो ।
अमेरिकास्थित एनआरएनको निर्वाचन समितिले अध्यक्ष पदका प्रत्यासी गौरी जोशीको नाम हटाइएपछि विवाद उत्पन्न भएको थियो । उक्त विवाद समाधानका लागि संघले छानबीन गरि प्रतिवेदन बुझाउन संरक्षक दिल गुरुङ, सल्लाहाकार विश्वआर्दश पण्डित र पूर्वप्रवक्ता डा. हेमराज शर्मा रहेको समिति गठन गरेको थियो ।
समितिका सदस्य विश्वआर्दश पण्डितका अनुसार समितिले शनिवार साँझ आफ्नो पूर्ण प्रतिवेदन गैरआवासीय नेपाली संघ समक्ष बुझाएको छ । समितिका तीनै जना सदस्यले संकलन गरेको राय र प्रमाणका आधारमा समितिले अन्तिम निष्कर्ष निकालेको बताएको छ ।
समितिले एनआरएन अमेरिकाको स्थापना र अध्यक्ष पदका प्रत्यासी गौरी जोशीको योग्यताका सम्वन्धमा करिब ३० पेज लामो प्रतिवेदन दिएको छ । जसमा ३२ वटा दस्तावेज सहित ४ सय पेज भन्दा बढीको प्रमाण जुटाएको जनाइएको छ । समितिले आफ्नो प्रतिवेदन पेश गर्नुअघि अध्यक्ष शेष घले लगायतका गैरआवासीय नेपाली संघका पदाधिकारीसमेतसँग परार्मश गरेको थियो ।
समितिको प्रतिवेदनपछि गैरआवासीय नेपाली संघ अमेरिकाको निर्वाचनसम्बन्धी विवाद अन्त्य हुने अपेक्षा गरिएको छ । समितिको प्रतिवेदन बमोजिम अब जोशीलाई समेत निर्वाचनमा समावेश गरेर मात्र एनआरएन अमेरिकाको निर्वाचन प्रक्रिया अगाडी बढ्ने बताइएको छ ।
जोशी अफूलाइ उम्मेदवार हुन निर्वाचन समितिले रोक लगाएपछि अमेरिकाका बिभिन्न राज्यहरूमा शूभचिन्तकहरूसँगको भेटमा व्यस्त छन् । शुक्रबार लसएन्जलस र शनिबार उनी सानफ्रान्सिस्कोमा शूभचिन्तकहरूलाइ भेटेर संबोधन गरेका थिए । अाइतबार उनी नेपाली जनसम्पर्क समितिको पिकनिक सहितको भेलामा सहभागी हुँदैछन् ।
प्रतिक्रिया