हिमालयखवर संवाददाता
न्यूयोर्क (अमेरिका)– गैर आवासीय नेपाली संघ (एनआरएन) अमेरिकाको अध्यक्ष पदका उम्मेदवार गौरीराज जोशी समूहका उम्मेदवारहरुको सूचि तय भएको छ ।
सोमबार साँझ भएको गौरी जिताउ अभियानको कन्फरेन्स बैठकले उम्मेदवारको सूचि तय गरेको हो । बैठकमा जनसम्पर्क समिति अमेरिका, प्रवासी मञ्च, राप्रपा निकट प्रवासी संगठन लगायत अमेरिकामा रहेका नेपालीमुलका प्रवुद्ध व्यक्तिहरुको सहभागिता थियो ।
उक्त बैठकले तय गरेको गौरी जोशी समूहका उम्मेदवारहरुमा वरिष्ठ उपाध्यक्षमा तेम्बा नोर्बु शेर्पा न्यूयोर्क छन् । त्यस्तै उपाध्यक्षहरुमा जेदु पोखरेल, उमा कार्की थापा, पुरुषोत्तम बोहोरा र सञ्जीव श्रेष्ठ छन् ।
महासचिव, कोषाध्यक्ष र सहकोषाध्यक्षमा क्रमशः धर्म भट्टराई, पूर्ण चन्द्र बानिया र रेवती अधिकारीको नाम तय गरिएको छ । महिला संयोजकमा लक्ष्मी खरेल थापा र युवा संयोजकमा स्वराज खातीको नाम तय गरिएको बैठकमा सहभागी एक सदस्यले हिमालय खबरलाई बताए ।
गौरी जोशी टीमबाट सदस्यको उम्मेदवारहरुमा शशी अधिकारी, तिर्सना शर्मा, बिष्णु शाह, प्रितीसागर खत्री, उत्तम शर्मा लामिछाने, सञ्जय थापा, लाक्पा लामा, परशु भण्डारी रहेका छन् ।
‘यो समूहबाट आकांक्षीहरुको सूचि लामो रहेकोले केही पदहरु खाली राखिएको छ,’ ती नेताले भने । केही दिनभित्रै सबैको नाम समावेश सूचि तयार भएर सार्वजनिक गरिने समेत उनले बताए ।
अमेरिकाको भूगोल, विचार, जातीगत, क्षेत्रगत सबै हिसाबले निकै गहन रुपमा अध्ययन गरेर सूचि बनाइएको दावी ती नेताले गरेका छन् । ‘यो टीम एनआरएन अमेरिकालाई हाँक्नसक्ने क्षमता भएका, जोश जाँगर बोकेकाहरुले भरिएको छ,’ उनले भने ।
यो समूहलाई एमाले निकट प्रवासी मञ्चले सहयोग गर्ने देखिएको छ । किनकी मञ्चका पूर्ब अध्यक्ष थापा यो समूहबाट सदस्यको उम्मेदवार बनेका छन् ।
‘गौरी जोशी आफैँमा युवाहरुमा लोकप्रिय छन्, त्यसमाथि जनसम्पर्क समिति अमेरिका, प्रवासी मञ्च, जनजाती महासंघ, अमेरिकामा लोकप्रिय श्री पराजुली लगायतका व्यक्तिहरुको साथ र समर्थनले सबैभन्दा बलियो टीम यही हुने देखिएको छ,’ गौरी जिताउ अभियान समन्वय समितिका एक नेताले भने ।
समन्वय समितिमा एनआरएन अमेरिका तथा जनसम्पर्क समिति अमेरिकाका पूर्व अध्यक्ष खगेन्द्र जिसी संयोजक छन् । समितिमा आनन्द विष्ट, संजय थापा, श्री पराजुली, नगेन्द्र पौडेल, अम्बिका अधिकारी, विनोद शाह, सानुबाबु सिलवाल, लुईसांग वाईवा, शुन्दर गुरुङ, मुकुन्द दुंगाना, बिनोद भट्ट लगायत छन् ।
उता अध्यक्षका अर्का उम्मेदवार डा.केशव पौडेल समूह जोशी समूहको सूचि हेरेर आफ्नो रणनीति तय गर्ने तयारीमा छ । गत हप्ता पौडेलले हिमालय खबरसँग प्यानल नबनाउने बताएपनि भित्री रुपमा प्यानल बनाएर अघि बढ्ने तयारीमा पौडेल समूह अघि बढेको छ ।
अध्यक्षकी अर्की बलिया उम्मेदवार रविना थापा पनि टीम बनाएर अघि बढ्ने तयारीमा छिन् । उनलाई वरिष्ठ उपाध्यक्षमा मनाएर आफु अध्यक्ष बन्ने प्रस्ताव लिएर डा. पौडेलको समूह पुगेको थियो । तर रविनाले त्यो प्रस्तावलाई ठाडै इन्कार गरेकी छन् ।
रविनालाई जनसम्पर्क समिति अमेरिकाका वरिष्ठ उपाध्यक्ष धनञ्जय नरसिंह केसी लगायतका नेताहरुको साथ र समर्थन छ ।
अध्यक्षका उम्मेदवार राम सी पोखरेलले भने प्यानल नबनाई अघि बढ्ने बताए ।
प्यानल बनाएर चुनावमा जान उचित नहुने सुझाव आएपनि जोशी समूह भने टीम बनाएरै जाने रणनीति अनुसार अघि बढेको हो । ‘टीम आएन भने योजना अनुसारका कामहरु गर्न गाह्रो पर्छ, खिचडी पाराले अब एनआरएन चलाउन सकिँदैन । त्यही भएर बलियो टीम बनाएर जाने निधोमा पुगेका हौँ,’ ती नेताले भने ।
प्रतिक्रिया