समाज / राजनीति

मनोनयन दर्ता गर्ने क्रममा बम विस्फोट, नौजना घाइते

457 पटक पढिएको

18th Jun 2017, Sunday | २०७४ आषाढ ४, आईतवार ०३:५१
कपिलवस्तु । बाणगङ्गा नगरपालिकामा आइतबार बम विस्फोट हुँदा नौजना घाइते भएका छन् । 
 
बाणगङ्गास्थित निर्वाचन अधिकृतको कार्यालयनजिकै बम विस्फोट भएको हो । बम विस्फोटबाट बाणगङ्गा–५ मटेरियाका ३८ वर्षीय लालबहादुर थारू र सोही ठाउँका ४५ वर्षीय शेषराम गुप्ता गम्भीर घाइते भएको इलाका प्रहरी कार्यालय पिपराका प्रहरी निरक्षीक राजु कार्कीले जानकारी दिए । दुवै जनालाई उपचारका लागि बुटवल अस्पताल पठाइएको छ । 
 
अन्य घाइतेमा बाणगङ्गा–५ का बेझे थारू, विजय थारू, कमलेशप्रसाद लोनिया, बाणगङ्गा–९ का रुपलाल गुरुङ, उनकी श्रीमती सुशीला गुरुङ र सात महिनाकी छोरी मिनाक्षी रहेका छन् । 
 
बम कसले विस्फोट गराएको भन्ने बारेमा यकिन हुन सकेको छैन । नेकपा (एमाले)ले मनोनयन दर्ता गरेर फर्किएपछि नेपाली काँग्रेस र नेकपा माओवादी केन्द्रको संयुक्त गठबन्धनले मनोनयन दर्ता गर्ने क्रममा सो बम विस्फोट भएको हो । 
 
विस्फोट विप्लव माओवादीले गराएको आशंका गरिएको छ । रातो टालोसहितको साइकललाई एक अपरिचित व्यक्तिले भीडनजिकै छाडेर गएको केही क्षणमै विस्फोट भएको बताइएको छ । रासस