हिमालयखवर संवाददाता
अमेरिका- युएस इमिग्रेसन एण्ड कस्टम्स इन्र्फोस्मेण्ट(आईसीई) अर्थात् आईसले आर्थिक वर्ष २०१६ मा २५ नेपालीलाई समातेर डिर्पोटेशन गरी नेपाल फिर्ता पठाएको छ । गैरकानुनी रूपमा अमेरिका बस्ने कागजात विहिनको खोजविन, पक्राउ र फिर्ता पठाउने निकाय आईसले गत वर्ष २ लाख ४० हजार २५५ जनालाई अमेरिकाबाट डिर्पोट (फिर्ता) पठाएको थियो । जसमा २५ जना नेपाली परेका हुन् ।
आईसले जहाजमा राखेर सुरक्षा अधिकारी सहित डिर्पोटेशनमा परेका व्यक्तिलाई सम्बन्धित देशको इमिग्रेसन अधिकारीलाई वुझाउंछन् । गत आर्थिक वर्ष आईस मार्फत यसरी फिर्ता पठाईएका कागजात विहिनको सङ्ख्या २ प्रतिशतले बढी हो । कुनै न कुनै अन्य अपराधमा संलग्नलाई प्रथामिकता दिएर फिर्ता पठाईन्छ । गत वर्ष यसरी फिर्ता भएका मध्ये ५८ प्रतिशत कुनै न कुनै अपराधमा संलगन भएको आईसले हालै सार्वजनिक प्रतिवेदनमा जनाएको छ ।
फिर्ता गरिएका मध्ये सबैभन्दा बढी मेक्सिकोका छन् । आईसले गत आर्थिक वर्ष १ लाख ४९ हजार ८२१ लाई समाएर फिर्ता पठाईदिएको थियो । यो आईसले फिर्ता गरेकोमा ६४ प्रतिशत हो । यस पछि ग्वाटेमालाका नागरिक डिर्पोटेशनमा परेका छन् । ग्वाटेमालाका ३३ हजार ९४०लाई आईसले फिर्ता पठाईदिएको छ । हन्डुरसका २१ हजार ९९४, इलसाल्भाडोरका २० हजार ५३८ र डोमोनिक रिपल्लिकका १ हजार ९८१ डिर्पोटेशनमा परेका छन् । यी सबै अमेरिका नजिकका देश हुन । यस पछि डिर्पोटेशन दर उच्च हुनेमा कोलम्बिया, इक्वेडर, ब्राजिल, निकारागुवा र जमैका छन् ।
गत वर्ष आईसले ३ सय ५३ जना भारतीयलाई डिर्पोटेशन गरेको थियो । यस्तै चीनका ३ सय ९८ जना पनि गत वर्ष आईसको डिर्पोटेशनमा परे । आईसले डिर्पोटेशन गर्दा विभिन्न वायु सेवा, चार्टर जहाज, बस र पैदलमार्गपनि प्रयोग गर्ने गरेको छ । गत वर्ष यसरी डिर्पोटेशनमा परेका मध्ये १ लाख १० हजारलाई जहाजवाट फिर्ता पठाइएको थियो । फोटो साभार: सामाजिक संजाल
प्रतिक्रिया