हिमालयखवर संवाददाता
ड्यालस (टेक्सस)– अमेरिकाको नेपाली फुटबल क्लब ‘भास्तिका ड्यालस गोर्खा’ ले बालबालिकाको निम्ति सकर क्लिनिक सुरु गर्ने भएको छ ।
झण्डै तीन महिनासम्म स्कुल बिदा हुने समयमा बालबालिकाको समय सदुपयोग गर्नका लागि फुटबल सिकाउने योजना सहित सकर क्लिनिक सुरु गर्न लागिएको हो । चार वर्षभन्दा माथिका उमेरका बालबालिकालाई मुख्यगरि फुटबल (सकर) सिकाउनका लागि ‘सकर फर किड्स’ नाम दिइएको यो कार्यक्रम सुरु गर्न लागिएको क्लबका मेनेजर विनोद विष्टले जानकारी दिए ।
‘सानैदेखि सकरको बेस राम्रो हुनसक्यो भनेमात्र भविष्यमा उनीहरु कुशल खेलाडी हुनसक्छन् । त्यही भएर हामीले बालबालिकाको समय अनुकुल मिलाएर यस पटक पनि कार्यक्रम सुरु गर्न लागेका हौँ,’ विष्टले बताए ।
तीन महिना अवधिको लागि दर्ता शुल्क एकसय डलर तोकिएको छ । साताको दुईदिन मंगलबार र शनिबार हुने तालिममा आफ्ना बालबालिकालाई सहभागी गराएर खेलप्रति जागरुक गराउन विष्टले नेपाली समुदायसँग अपिल गरेका छन् । दुईसातापछि सुरु हुन लागेको यो तालिमका लागि अहिलेनै आफ्ना बालबालिकालाई भर्ना गराउन समेत उनले आग्रह गरेका छन् ।
गत वर्षदेखि संस्थाले बालबालिकाको वृहत्तर विकासका लागि यस्तो कार्यक्रम राख्दै आएको छ । यसपटक सर्टिफाइड कोचको मसेत व्यबस्था गरिएको छ ।
प्रतिक्रिया