भरतपुर महानगरमा कसले बाजी मार्छ भनेर सबैको ध्यान मतगणनामा केन्द्रित भएका बेला बिहीबार राति पश्चिम चितवनको शुक्रनगरमा लुटपाट भएको छ ।
भरतपुर महानगरपालिका–२५, शुक्रनगरस्थित साहुनी महतोको घरबाट गहना र नगद लुट्नुका साथै एकै परिवारका तीजनालाई हतियार प्रहार गरेर घाइते बनाएका छन् । चितवन प्रहरीले दिएको जानकारीअनुसार मुखमा माक्स लगाएर आएका लुटेराको समूहले महतोको छोरी र बुहारीको गरी ८/९ तोला सुन, करिब दुईलाख रूपैयाँ नगद र चारवटा मोबाइल सेट लुटेर लगेका छन् ।
लुटेराको समूहले घरमुली ५५ वर्षीया साहुनी महतो, ३२ वर्षीय छोरा गंगासागर महतो र २७ वर्षीय छोरी रामकुमारी महतोलाई हतियार प्रहार गरी घाइते बनाएका हुन् । उनीहरूको हाल भरतपुरस्थित चितवन मेडिकल कलेजको सघन उपचार कक्ष र आकस्मिक कक्षमा उपचार भइरहेको छ । घाइतेमध्ये आमा र छोरी खतरामुक्त रहे पनि छोरा गंगासागरको अवस्था गम्भीर रहेको प्रहरीले जनाएको छ ।
प्रतिकार गर्दा मुखमा माक्स लगाएर आएका लुटेराहरूले आमाछोरीलाई हथौडा र छोरालाई गोली हानेर घाइते बनाएको प्रहरीले जनाएको छ । घाइते तीनैजनाको टाउकोमा चोट लागेको छ । निर्वाचनका बेला सुरक्षा मजबुत बनाए पनि निर्वाचनप्रति बढी केन्द्रित हुँदाको मौका छोपेर आपराधिक तत्वले भित्री एरियामा डकैती गरेको जिल्ला प्रहरी कार्यालयका प्रहरी प्रमुख प्रहरी उपरीक्षक दीपक थापाले जानकारी दिए ।
सबैको ध्यान स्थानीय तह निर्वाचनतर्फ केन्द्रित भइरहँदा शुक्रनगर घटनाले जिल्लाको सुरक्षा व्यवस्थापनमा अर्को चुनौती थपिएको छ । घटनाबारे थप अनुसन्धान भइरहेको र हुलियाको आभारमा घटनामा संलग्न रहेको शंकास्पद ६ जनालाई प्रहरीले नियन्त्रणमा लिएको छ ।
प्रतिक्रिया