नयाँ दिल्ली । भारतमा कोरोनाभाइरसबाट सङ्क्रमित भएकाहरुको दैनिक सङ्ख्या प्रतिदिन अविश्ववसनीय ढंगले वृद्धि हुँदै गइरहेको छ । पछिल्लो २४ घन्टामा अहिलेसम्मकै सबैभन्दा धेरै ९० हजार ६३३ जना सङ्क्रमित भएको अधिकारीहरुले जानकारी दिएका छन् । 

योसँगै भारतमा कोरोनाभाइरसबाट अहिलेसम्म कुल सङ्क्रमितहरुको सङ्ख्या झन्डै ४२ लाख पुग्न लागेको छ ।  

संघीय (केन्द्रीय) स्वास्थ्य मन्त्रालयले दिएको जानकारीअनुसार भारतमा कोरोनाकै कारण मृत्यु भएकाहरुको सङ्ख्या अहिलेसम्म ७१ हजार ७३९ पुगेको छ । 

कुल मृतकमध्ये एक हजार ६५ जनाको पछिल्लो २४ घन्टामा मृत्यु भएको पनि मन्त्रालयले आइतबार जनाएको छ  । 

भारतमा कोरोनाका कारण अहिलेसम्म ४१ लाख ९६ हजार १३१ जना सङ्क्रमित भएका छन् । तीमध्ये ३२ लाख ४० हजार ९७७ जना सङ्क्रमणमुक्त भइसकेका छन् ।

अधिकारीहरूका अनुसार अरु आठ लाख ८३ हजार ४१५ जना अझै पनि सङ्क्रमित अवस्थामै रहेका छन् । 

भारतमा अहिलेसम्म चार करोड ८८ लाख मानिसको कोरोना परीक्षण गरिएको भारतीय चिकित्सा अनुसन्धान परिषद्ले जानकारी दिएको छ ।